33 jastaǵy Aıda Aısarova óziniń 11 maýsym kúni taksıde zorlanǵanyn jáne esinen tanyp qalǵanyn paıdalanǵan taksı júrgizýshisi 158 myń teńge aqshasyn urlap ketkenin aıtyp otyr, - dep habarlaıdy Qamshy.kz informburo.kz – ke silteme jasap.

Almatyda baspasóz máslıhatyn ótkizgen jábirlenýshi men qorǵaýshylar atalǵan isti tergeýde polısıa organdarynyń qulyqsyzdyq tanytyp otyrǵanyn aıtady.

Bes jasar ulyn jalǵyz tárbıelep otyrǵan 33 jastaǵy ana Aıda Aısarova 11 maýsym kúni jigitimen sózge kelip, urys-keris kezinde esinen tanyp qalady. Tanystary ony esin jıǵan soń taksıge salyp jiberedi. Alaıda, Aıda taksıge otyrǵan soń taǵy da esinen tanyp qalady. Taksıshi de osyny paıdalanyp, jolaýshy qyzdy zorlap, ózimen birge alyp kele jatqan aqshasyn da qaǵyp ketken.

Osy oqıǵadan keıin Aıdanyń esinen tanyp qulaýy jıilegen.

«Psıhologıalyq travma onyń ımýndyq júıesine áser etken. Mundaı psıhosomatıkalyq jaǵdaı oda ár tergeý kezinde bolyp júr. Alaıda, aýdandyq İİB –degiler birde-bir ret dáriger shaqyrmaǵan, tergeý kezinde psıhologtyń kómegine júginbegen», - deıdi #ÚndemeımizKZ (#NeMolchıKZ) ulttyq qozǵalysynyń belsendisi Dına Smaılova.

Bettestirý kezinde jábirleýshini tanyǵanyna qaramastan polısıa tek «Tonaý» baby boıynsha ǵana is qozǵaǵan. Al, zorlaý týraly birde-bir ret sóz bolmaǵan kórinedi.

Birneshe jyl buryn kúıeýimen ajyrasyp, balasyn jalǵyz tárbıelep otyrǵan jábirlenýshi «GÝM» saýda ornynda satýshy-keńesshi bolyp jumys isteıtin kórinedi. Anasynyń naýqastyǵyn, ákesi jaqynda kóz jumǵanyn aıtqan Aıda basyndaǵy jaǵdaı týraly týystaryna aıtpaı kelgen. Oǵan bir aǵasynyń jaqynda ınfarkt alýy da sebep bolǵan.

«Túrksib aýdandyq İİB-de isti sozyp jatyr. Osymen úshinshi tergeýshi aýysty. Olardyń barlyǵy da Aıda taksı júrgizýshisimen óz erkimen jynystyq qatynasqa túskenin aıtqyzǵysy keledi, ózin kináli etemiz dep qorqytady. Onyń meken-jaıy jábirlegen azamatqa da polısıa aıtyp bergen», - deıdi Dına Smaılova.

Qazir A. Aısarova Bas prokýrordyń atyna ashyq hat jazyp, odan polısıa qyzmetkerleriniń jumysyn baqylaýǵa alýdy surap otyr.