Búgin qarashanyń 7-i kúni «MýzART» tobynyń múshesi, tanymal ánshi, ǵajap qońyr daýystyń ıesi Meırambek Bespaevtyń dúnıege esigin ashqan kúni. Án ataýlysyn júrekpen sezinip aıtatyn Meırambek el aýzynan eshqashan túsken emes. «Boztorǵaıdy» jaqsy kóretin, «Qoshtasqysy kelmeıtin» ol bıyl qyryq jasqa kelip otyr. Óziniń qyryq jasy týraly Meırambek ınstagram áleýmettik jelisinde bylaı depti: «Keshegi júrgen bala edik, kelip te qappyz qyryqqa». qamshy.kz portaly qazaqtyń súıikti ulyn týǵan kún merekesimen quttyqtaı otyryp, aqyn Erbol Beıilhannyń Meırambek Bespaevqa arnap jazylǵan óleńin nazarlaryńyzǵa usynady.

Qyzdardyń tilegi

Meırambek Bespaevqa! 

«Qyzdyń jasy on segiz» surama, aǵa!? 
Ómir syrǵyp barady tura ma, aǵa!.. 
Mıllıondaǵan qyzdardyń armany úshin, 
Tý tikken bıigińnen qulama a-ǵ-a! 

Sizge arnap tergem erke gúlderimdi, 
Kórseńiz ǵoı, bir kelip kúlgenimdi... 
Siz salǵan áýenderdi júrekke orap, 
Ótkizip, júrmin aǵa, kúnderimdi... 

Qaıtemin, sezim názik, búrshigimdi, 
Eshkimge aıta almaımyn bul syrymdy. 
Ázirshe áýen ǵana terbetedi, 
Soǵatyn júrek degen tylsymymdy. 

Óleń de ómir eken, esi barǵa, 
Arnamyz aq aıdynnan qosylar ma?.. 
MýzART-tyń muzbalaǵy siz shyqqanda, 
Otyram únsiz qarap ekranǵa!... 

Shashyńyzǵa, qop-qoıý qasyńyzǵa, 
Táńirim, baq syılasyń basyńyzǵa! 
Qaraqattaı janarym jáýteń qaǵyp, 
Shaı quıyp otyrar ma em, qasyńyzda... 

Qylyǵym, oǵash bolsa, tergeısiz be? 
Qyzǵaldaq tergýge de kelmeısiz be? 
Úzdikken ekranda mıllıon arý, 
Shynymen, aǵa bizdi kórmeısiz be?... 

Toshala tergende alam kók sebepti, 
Áýenińiz, jan aǵa, kókke ketti. 
Siz jaıly qos qurbyma syr aıtyp em, 
Ekeýi meni qatty ókpeletti... 

Jaqsyǵa tilekshi bul el júregi, 
Kóńildiń kók aıdynyn eljiredi. 
Án túgil ózine de ǵashyqpyz dep, 
Qurbymnyń bota kózi móldiredi. 

Án syılap, júrshi aǵa, tańymyzǵa, 
Ónerdi súıý bar-aý qanymyzda. 
Amal ne, qyzdyń bári tilekshimiz, 
Sálem aıta salyńyz, jaryńyzǵa!