Búgin Astana qalasyndaǵy mamandandyrylǵan aýdanaralyq qylmystyq ister jónindegi áskerı sot Toqtar Tóleshov pen onyń sybaılastaryna qatysty úkim shyǵardy, dep habarlaıdy «Qamshy» portaly.
Sot bas aıyptalýshy Toqtar Tóleshovty kináli dep taýyp, múlkin tárkileýmen 21 jylǵa bas bostandyǵynan aıyrdy. Ol jazasyn qatań rejımdi kolonıada óteıdi.
Toqtar Tóleshovke «halyqaralyq qylmystyq qaýymdastyqtyń beldi ókili retinde qylmys áleminiń bedeldi múshelerin qarjylandyrǵan» degen aıyp taǵylǵan. Naqty aıtqanda, ol «Bratskıı krýg» transulttyq qylmystyq qaýymdastyǵymen tyǵyz qarym-qatynas quryp, onyń kóshbasshylary men bedeldi múshelerine qarjylaı kómek kórsetip otyrǵan. Tergeý nátıjesinde Tóleshovtyń toqsannan astam arnaıy daıyndyqtan ótken jaýyngeri bolǵany anyqtaldy. Belgili bolǵandaı, onyń qylmystyq toby adamdardy urlap, óltirgen.
Budan bólek, Atyraýda «jer mıtıńilerin» ótkizgen Maks Boqaev pen Talǵat Aıanovtyń isi boıynsha da Toqtar Tóleshov aıypty dep tanylǵan. Ol boıynsha Atyraýda ótkizilgen zańsyz sherýdi ol qarjylandyrǵan.
Eske sala keteıik, Toqtar Tóleshov bıyl 30 qańtarda Shymkent qalasynda ustalǵan bolatyn. Bas kúdikti men onyń sybaılastarynan qarý, esirtki jáne belgili bir ádebıetter tárkilendi. Shymkenttik kásipkerge barlyǵy Qylmystyq kodekstiń 15 baby boıynsha aıyp taǵyldy. Maýsym aıynyń basynda Ulttyq qaýipsizdik komıteti Tóleshov pen onyń sybaılastary eldegi bılikti kúshpen basyp alýǵa daıyndyq jasaǵanyn habarlady.
Tóleshov isine qatysty sot Astanada 14 qyrkúıekte bastaldy. Barlyǵy 25 kúdikti. Sot prosesine 16 qorǵaýshy, 104 kýáger, 17 jábirlenýshi jáne 2 ókili qatysty. Qylmystyq is 300 tomnan turady. Toqtar Tóleshovtyń soty jabyq rejımde ótti.
