«Tómengi temperatýraly  jaryqshaqtaný kezinde asfáltbetondy jol tóseminiń ózin-ózi qurý zańdylyǵy»  atty ǵylymı eńbegi úshin qazaq ǵalymy Baǵdat Teltaev altyn medal aldy. Bul týraly «Qamshy» portaly Qazaqstan jol  ǵylymı zertteý ınstı­týty taratqan aqparatqa silteme jasap habarlaıdy.

  Instıtýttyń jetekshisi, «QazjolǴZI» AQ prezıdenti, tehnıka ǵylymdarynyń doktory, profesor, Ulttyq Ǵylym akademıasynyń qurmetti múshesi, Qazaqstan Respýblıkasy Ulttyq ınjenerler akademıa­synyń jáne Halyqaralyq kólik akademıa­synyń akademıgi, TMD jáne Qazaqstannyń qurmetti jolshysy Baǵdat Burhanbaıuly Teltaev Reseı jaratylystaný ǵylymdary akademıasy tóralqasynyń sheshimimen kórnekti orys fızıgi, Nobel syılyǵynyń laýreaty  Petr Kapısa atyndaǵy Altyn medalmen marapattaldy.  Baǵdat Burhanbaıuly bul joǵary marapatqa   «Tómengi temperatýraly  jaryqshaqtaný kezinde asfáltbetondy jol tóseminiń ózin-ózi qurý zańdylyǵy»  atty ǵylymı eńbegi úshin ıe bolyp otyr.    Bul ǵylymı jańalyq avtomobıl joldary salasyndaǵy eń alǵashqy ǵylymı jańalyq bolyp sanalady. B.Teltaevtyń  jańalyǵynda termodı­namıkanyń qaıtymsyz úrdisi men sınergetıka negizinde tempera­týralyq jaryqshaqtary bar asfáltbeton jol jamylǵysy, termodına­mıkalyq júıeniń syrtqy áserlerge beıimdelýiniń túri bolyp keletin erekshe dısspatıvtik qurylym ekendigi dáleldengen.  Atalmysh  zańdylyq, sondaı-aq, jaryqshaqtar sanyn aldyn ala  boljaýǵa jáne ártúrli aýa raıy men klımattyq jaǵdaıda asfalbeton quramyn tańdaý arqyly jaryqshaqtar sanyn kemitetin jobalar jasaýǵa múmkindik beredi.

Búgin osy jańalyqqa oraı Qazaqstan joldary ǵylymı zertteý ınstıtýty AQ baspasóz máslıhatyn ótkizbek.  Onda jol salasynyń mamandary ǵalymnyń ǵylymı jańalyǵyn jan-jaqty talqylap, ózderiniń oı-pikirlerimen bólisetin bolady.