Bıliktegi áıelder desek, oıyńyzǵa birden orta jastan asqan, aldy nemere súıip úlgergen názik jandylar oralady. NUR.KZ portaly nazarlaryńyzǵa jas ta bolsa bas bolyp, oryntaǵynda nyq otyrǵan hanymdardy tizip kórmek, - dep habarlaıdy Qamshy.kz.
Bıbigúl Asylova – Bilim jáne ǵylym mınıstriniń orynbasary
Bıbigúl hanym 2016 jyldyń maýsym aıynda mınıstrdiń orynbasary bolyp taǵaıyndaldy. Vıse-mınıstr diń kúıeýi de memlekettik qyzmetker. Baqytty otbasy Adema, Sultan esimdi ul-qyz tárbıeleýde.
Bıbigúl Asylova bir suhbatynda ata-enesimen bir shańyraq astynda turatynyn aıtqan edi. Onyń oıynsha, balalar úshin ata men áje beretin tárbıeniń oryny múlde bólek. Vıse-mınıstr birinshi orynǵa otbasyn qoıatynyn jasyrmady.
Dana Júnisova - «Atameken» UKP basqarma basshysynyń orynbasary
31 jastaǵy Dana Júnisova — burynǵy Selınograd qalasynyń týmasy. T.Rysqulov atyndaǵy Qazaq ekonomıka ýnıversıtetinen ekonomıs mamandyǵyn alyp shyqqan. Qazirgi kezde Eýropalyq ýnıversıtet baǵdarlamasy boıynsha Halyqaralyq bıznes akademıasynyń magıstranti.
Eńbek jolyn 2003 jyly «Kazaqstan temir joly» Ulttyq kompanıasy» AQ-da bas maman bolyp bastaǵan. 2015 jyldyń qazan aıynan bastap qazirgi ýaqytqa deıin — basqarma tóraǵasy orynbasarynyń mindetin atqarýshy — «Atameken» QR Ulttyq kásipkerler palatasynyń ekonomıkalyq ıntegrasıa departamentiniń dırektory qyzmetinde.
Jeke ómiri týraly ǵalamtorda esh málimet keltirilmegen.
Ásem Núsipova – «QazTransOıl» AQ bas dırektorynyń ekonomıka jáne qarjy jónindegi orynbasary
Ásem hanym Qazaq ulttyq ýnıversıtetinde atyshýly Gúljan Qaraǵusovadan tálim alǵan. Odan keıin Máskeýde, Londonda, Vashıngtonda tájirıbe jınaqtaǵan.
Aıta ketý kerek, Ásem Núsipova qarjy mınıstriniń, tipti premer mınıstrdiń keńesshisi qyzmetin, densaýlyq saqtaý vıse-mınıstri qyzmetterin atqaryp kelgen. Joǵary shendi ana óziniń eń basty jetistigi retinde Mansur jáne Marıam atty egiz ul men qyzyn kóredi.
Janar Bektaeva - Túlkibas aýdany ákiminiń orynbasary
Janar osy jyldyń kókteminde OQO-daǵy Túlkibas aýdany ákiminiń orynbasary qyzmetine jaıǵasty. Janar hanym 1982 jyly Jambyl oblysy, Qarataý qalasynda týǵan. Q.A.Iassaýı atyndaǵy ýnıversıtetin «Saıasattaný» mamandyǵy boıynsha támamdaǵan.
Esterińizge sala ketsek, Janar Bektaeva Sozaq aýdanynyń burynǵy ákimi Álibek Bektaevtyń qyzy.
Dınara Bolatbekqyzy – Qazaqstan boks federasıasynyń halyqaralyq baılanystar jónindegi úılestirýshisi
Jýrnalısıkadan sport menedjmentine birden aýysqan maman az ýaqyt ishinde tanylyp úlgerdi. Londonda teleradıojýrnalıstıka salasy boıynsha magıstratýrany támamdap, elimizde biraz ýaqyt telearnada qyzmet jasaǵany este. Shet tilinde emin-erkin sóıleıtin arý óz tilin de qatty qurmet tutady. Dınara boks federasıasy ótkizgen iri halyqaralyq jarystarda óziniń saýattylyǵymen jáne joǵary mádenıetimen kózge túsken bolatyn.
Anna Alábeva – Astana qalalyq jastar máslıhatynyń depýtaty
Anna 1993 jyly Shymkent qalasynda týǵan. Bes jasynan gımnastıkamen aınalysqan jas sportshy London Olımpıadasynan keıin sporttan ketetinin málimdedi. Ol qazir Astana qalasynyń jastar máslıhatynyń depýtaty, budan ári de ózin saıasattan kóredi. Sondaı-aq ol balalar men eresekterge arnalǵan gımnastıka stýdıasyn ashyp aldy.
