Qytaıdaǵy ónertapqysh qandasymyz Erkinbek Muhtarbekuly EKSPO-2017 kórmesine qaraı ózi jasaǵan, qazaqı úlgidegi áýe sharmen Shanhaıdan Astana qalasyna ushyp kelmek. Suhbatynda ol, Qytaıdyń Shanhaı qalasynan shyǵyp, Jibek joly boıymen júrip ótip, Astana qalasyna at basyn tireýdi kózdep otyrǵanyn málim etti.

«Bul meniń Qazaqstanda ótetin «EKSPO-2017» Halyqaralyq kórmesine daıyndap jatqan tartýym dep bilemin. Alla buıyrsa, Qytaıdyń Shanhaı qalasynan shyǵyp, Jibek joly boıymen júrip ótip, Astana qalasyna at basyn tireýdi josparlap otyrmyn. Sol arqyly eki eldiń dostyǵyn nyǵaıtyp, Astanada ótetin «EKSPO-2017» kórmesiniń nasıhattalýyna az da bolsa úlesimdi qosý», - deıdi Erkinbek Muhtarbekuly.

Onyń aıtýynsha, qazirgi kúni áýesharmen ushyp ótý baǵdary, jolda aıaldaý máselesi pysyqtalyp jatyr. Sonymen birge ol eki eldiń dostyǵyn jańǵyrtyp, EKSPO-2017 kórmesin nasıhattaýdy maqsat etip otyrǵanyn aıtty. «Bul jobany jasaýǵa kóptegen jyldar jumsadym. Mine sátimen bitip, synaqtan ótkizdim. Meniń basty maqsatym - qazaqtyń ónerin, bolmysyn álemge pash etý. Qazaq ejelden bas kıimdi jáne tulpardy qadirlegen halyq sol sebepti de áýeshardyń beınesin qazaqtyń oıýly bas kıimine uqsatyp jobaladym. Ol úlken bıiktikke kóterilgende bizdiń bas kıimdi jerdegi búkil halyq kıgendeı bolady. Bul - bereke-birliktiń kórinisi. Shardyń astynda tulpardyń músini beınelenip, adam otyratyn oryn jasalǵan. Aspan keńistigine kóterilgende, tulparǵa minip qazaqtyń qas batyry ushyp kele jatqandaı áser qaldyrady», deıdi joba avtory. Onyń aıtýynsha, jobany jasaýǵa jeke qarjysy jáne Qytaıdaǵy demeýshi qandastardan jınaǵan aqshasy jumsalǵan. Degenmen, sońǵy jumystaryna qarajat jetpeı turǵanyn da jasyrmady. «Múmkindik bolsa qaltaly azamattardan qoldaý kútemin», dedi ol.