Almatyda Bekmambetov cinema kınoteatrynda rejıser Sábıt Qurmanbekovtyń  «Oralman» tolyqmetrajdy kórkem fılminiń BAQ-qa arnalǵan jabyq kórsetilimi ótti,-dep  habarlaıdy «Qamshy» portaly tilshisi.

 Fılmdi Qazaqstan Respýblıkasynyń Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen. «Oralman» el  Táýelsizdiginiń 25 jyldyq mereıtoıyna oraılastyrylǵan.  Kıno týyndynyń  senarıin «Meniń atym Qoja» fılminde Qojanyń rólin somdaǵan akter, kınodramatýrg Nurlan Sanjar Sábıt Qurmanbekovtiń qatysýymen jazǵan.

  Basynda «Tóre-tam» dep atalmaq bolǵan fılm qazaq qoǵamyndaǵy otanyna oralǵan qandastardy jergilikti keı qazaqtardyń «oralman» dep bóle qaraýyna baılanysty, qoǵamǵa oı salý maqsatynda «Oralman» dep  ózgergen.  Basty rólderde: Dýlyǵa Aqmolda, Erjan Túsipov, Esim Segizbaev, Shynar Asqarova,  Baıan Qanjabıevalar oınaǵan. Fılmge án jazǵan kompozıtor Aıdos Saǵat. Fılm Tájikstan men Almaty oblysyndaǵy Saryózek eldi-mekeni mańynda  túsirilgen.  

 Fılm HH ǵasyrdyń 30-jyldary qyzyl áskerdiń jendetterinen Aýǵanystanǵa qonys aýdarýǵa májbúr bolǵan qazaq otbasy týraly. Bas keıipker Bazarbaı qarttyń sol jaqta bir qyz, bir uly dúnıege keledi.  Balalary eseıip, otbasyn qurady. Keıinnen týǵan jerdiń topyraǵyn ańsap, súıeginiń ata-jurtta kómilgenin qalaǵan qart  Qazaqstanǵa oralyp, kóz jumady. Uly Saparqul ákesin aqtyq saparǵa jalǵyz ózi shyǵaryp salady. Ata-jurt jumaq mekenimiz dep ańsap kelgen otbasy jergilikti qazaqtardan «oralmansyń», «satqynsyń» degen aýyr sózdermen, shettetýlerdi jıi estıdi. Soǵan qaramastan  Aýǵanstanda azanshy bolyp jumys istegen Saparqul qırap qalǵan áskerı radar ǵımaratyn qaıta jóndep, ornyna meshit turǵyyzady.

"Oralman" qalyń kópshilikke kelesi jyldyń naýryz aıynda jol tartpaq. Kıno kartınanyń ómirge kelýine atsalysqan azamattar elimizdiń túkpir-túkpirindegi  kınoteatry joq shalǵaı  aýyl qazaqtaryna bul týyndyny tamashalýǵa barynsha jaǵdaı jasaýǵa tyrysatyndaryn aıtty.