Qazaqstan Prezıdenti Nursultan Nazarbaevtyń Japonıaǵa is-saparmen barǵany týraly japon buqaralyq aqparat quraldarynda materıaldar jarıalanýda. «NHK» teleradıo korporasıasy «Orta Azıada ornalasqan Qazaqstan respýblıkasynyń basshysy N.Nazarbaev qarashanyń 6 kúni Japonıaǵa keldi» dep habarlady. Keńes kezindegi ıadrolyq synaq saldarynan áli de kóptegen azamattardyń densaýlyq zardabyn tartyp jatqanyn aıta kele, «Qazaqstan Prezıdenti qarashanyń 6 men 9 aralyǵynda Japonıada bolyp, ımperatormen jáne premer-mınıstr Abe Shındzoýmen kezdesedi. Bul kezdesýlerde eki el arasyndaǵy ekonomıkalyq yntymaqtastyq týraly pikir almasady. Sondaı-aq Parlamentte baıandama jasaıdy» deıdi.  

«Qazaqstanda Keńes dáýirinde soltústik shyǵystaǵy Semeı polıgonynda 450-den astam synaq jasalyp, qazirde sol aımaqtaǵy halyq sonyń zardabyn tartýda. Sondyqtan Prezıdent Nazarbaev qarashanyń toǵyzynda Hıroshımaǵa baryp, Beıbitshilik parkinde bolyp, Atom bombasy mýzeıine bas suǵady. BUU qurylǵan kúnnen bastap 2045 jylǵa deıingi 100 jyldyq merzimge arnalǵan atom bombasy jarylysyna jol bermeýge qatysty ǵalamdyq maqsat týraly sóz sóıleıdi. Buǵan qosa Prezıdent Nazarbaev munaı men tabıǵı gaz sıaqty resýrstarǵa baı Qazaqstanǵa bıznes ókilderin shaqyrý maqsatynda  kelesi jyly Astana qalasynda ótetin, energıany basty taqyryp etken halyqaralyq kórme jaıly japon kásipkerlerimen áńgimelesedi».

«Asahı» basylymy da ımperatordyń Qazaqstan Prezıdenti Nursultan Nazarbevpen kezdeskeni týraly aqparatty jarıalady. Bul kezdesýde japon sarbazdary (Sibir áskerı tutqyndary) men jekelegen turǵyndardyń konslagerge,  bir bóligi Qazaqstanǵa aıdalǵany týraly aıtyldy. Imperator saraıy basqaramasynyń málimetine súıensek, sol elde ómir súrgen japondar týraly áńgime qozǵalyp, ımperator Qazaqstanǵa barǵan japon azamattaryn halyqtyń jyly qabyldaǵany úshin alǵys aıtty.

«Qazaqstan Prezıdenti atom bombasy jarylysyn bastan ótkergen Hıroshıma qalasyna alǵash ret barmaq» dep habarlaıdy japon basylymy. «Asahıdiń» jazýynsha, Qazaqstan Prezıdentiniń sózin japon ımperatory zor yqylaspen, muqıat tyńdaǵan.

«Nıhonkeıdzaı shınbýn» ekonomıkalyq basylymy 8 qarashada ımperatordyń Qazaqstan Prezıdentin qabyldaǵanyn týraly materıal jarıalady.  «Iomıýrı» basylymy da Nursultan Nazarbaevtyń Hıroshımaǵa alǵashqy sapary týraly habarlaı otyryp, Semeı polıgony zardaptaryna toqtalady.

«Iomıýrı» Nazarbaevtyń Hıroshımadaǵy atom bombasynan qaza tapqandar eskertkishine gúl shoqtaryn qoıyp, Atom bombasy mýzeıine baratynyn habarlaıdy. Sondaı-aq Elbasy Hıroshıma halyqaralyq konferensıa ortalyǵyndaǵy jıynda sóz sóılemek. Jıynǵa 200 adam qatysatynyn jazǵan «Nıhonkeıdzaı shınbýn» Hıroshıma turǵyndaryn atalmysh jıynǵa kelýge shaqyrady.

Sharafat Jylqybaeva