«Almaty Taýers» bıznes ortalyǵyndaǵy órt saldarynan qaza tapqan 5 adamnyń stýdentter ekeni anyqtaldy. Olar oqys oqıǵa bolǵan kezde ǵımarattan qashyp shyǵa almaı qalǵan. Óıtkeni syrtynan qulyptap ketipti. Alapat órtte tirideı janyp ketken stýdentterdiń tórteýi – Ońtústik Qazaqstan oblysynyń týmalary. Taǵy biri Almaty oblysynan. Búgin olardyń deneleri týǵan jerlerine jiberildi. Aıta keteıik, jeksenbi kúni keshke bolǵan órtten 54 jastaǵy dánekerleýshi de qaza tapqan.
Bul týraly Ktk arnasy habarlaıdy.
Alapat órt ómirin jalmaǵan stýdentterdiń denesi búgin Almatydaǵy sot-medısınalyq saraptamasy ortalyǵynan shyǵarylyp, týǵan jerlerine jiberildi. Olardyń ata-analary men týystary túnnen beri kóz ilmeı osynda júr. Al marqumdar bilim alǵan oqý oryndarynda stýdentterdiń sýretteri qoıylǵan. Qyrshyn ketken Elaman Aıdaralıev pen Nurlybek Sartaev – ál-Farabı atyndaǵy Qazaq ulttyq ýnıversıteti fızıka-tehnıkalyq fakúltetiniń 3-kýrs stýdentteri eken. Týystarynyń aıtýynsha, olar jumys istep jatqan bólme syrtynan qulyptalyp, balalar qamalyp qalǵan.
Sanat Maldybekov, marqum E. Aıdaralıevtyń naǵashysy:
-Qaraýsyz qalǵa ǵoı. Esikti japqan. Ottyń ortasynda qalǵan. Shyǵatyn jer joq. Kúıip ólgen, janyp ólgen.
Azapty ólimmen kóz jumǵan beseýiniń biri – Asfendıarov atyndaǵy Qazaq ulttyq medısına ýnıversıtetiniń 2-kýrs stýdenti Ismaıljon Israılov. Jıyrmadan endi asqanbozbala tis dárigeri bolýdy armandaǵan eken. Ótken jeksenbide ol «Almaty Taýers» ǵımaratyndaǵy qabyrǵaǵa plasık materıaldar qaǵyp berip, aqsha tabý úshin barǵan eken. Ákesiniń aıtýynsha, jumys berýshiler kináni balalardyń ózderine jappaqshy.
Esraly Israılov, marqum I. Israılovtyń ákesi:
-Keri qaraı zattaryn alyp ketý úshin barǵan deıdi. Óz ómiri úshin qoryqqan adam altyn berse de ondaı jerge qaıtyp barmaıdy ǵoı. Olar qashyp shyqqysy kelgen. Biraq esik jabyq bolǵan. Olardy eshkim baqylamaǵan.
Qanysh Sátbaev atyndaǵy Qazaq ulttyq tehnıkalyq zertteý ýnıversıtetiniń 2 jáne 4-kýrs stýdentteri Ekýbjon Tohtamyshov pen Abylaı Zulpybekov te sol qyrshyn qıylǵandardyń qatarynda. Barlyq joǵary oqý oryndary marqum stýdentterge qurmet bildirip, ýnıverstıtet qabyrǵasynda qaraly habardy jarıalap qoıǵan. Sondaı-aq, stýdenttik uıymdar da olardyń týystaryna qoldan kelgenshe kómekterin berip jatyr. Tek janǵa batatyny, balalardy jaldaǵan kompanıa basshylary kóńil aıtýdyń ornyna qoqan-loqqy kórsetip júr eken.
Sanat Maldybekov, marqum E. Aıdaralıevtyń naǵashysy:
- Kompanıanyń basshylarynan bir adam kelmedi. Kóńil aıtýdyń ornyna dikeńdep júr. Suraýy joq adamdar emes.
Qaza tapqan stýdentter 20-22 jas aralyǵynda eken. Barlyǵyn da ustazdary tek jaqsy qyrynan sıpattap berdi. Al órttiń ózi neden tutanǵany áli anyqtalǵan joq. Aıta keteıik, osy órt saldarynan 54 jastaǵy dánekerleýshi de qaza tapqan edi. Sóıtip, Almatynyń qaq ortasynda jeksenbi kúni bolǵan órt 6 adamnyń ómirin jalmady.
