Qazaqstannyń Saýd Arabıasyndaǵy Tótenshe jáne Ókiletti elshisi Baqyt Batyrshaev, búginde ol jerde dinı bilim alyp júrgen qazaqstandyqtardyń ishinde terorızmge qatysy bar degen kúdikpen ustalǵandardyń bar ekenin aıtty, dep xabarlaıdy «Qamshy» portaly QazAqparatqa silteme jasap. Ol elde oqyp júrgen qazaqstandyqtar Islam dininiń barlyq mazhabtaryn oqıdy.

Búginde Saýd Arabıasynda 95 qazaqstandyq stýdent bilim alyp júr. Olardyń basym bóligi Medına ıslam ýnıversıtetinde oqıdy. «Atalǵan joǵary oqý ornynda tórt mazhabtyń barlyǵy oqytylady. Endi, ol ýnıversıtetke álemniń túkpir-túkpirinen ǵalymdar kelip, dáris oqıdy. Sondyqtan jastardyń teris aǵymda ketip qalý qaýpi bar. Ondaı jaǵdaılar bar dep aıta alamyn. Onyń keıbir nyshandaryn biz baıqap ta, kórip te otyrmyz», - degen B.Batyrshaev. Elshiniń sózine qaraǵanda, dinı bilim alyp júrgen stýdentterdi únemi baqylaýda ustap otyrady. Al keleńsiz jaǵdaılar bolsa, tıisti sharalar qolǵa alynady. Bıyl terorızm aıybymen bizdiń jeti azamatymyz ustalǵan. Qazir beseýi Qazaqstanǵa qaıtaryldy.

Aıta keter bolsaq, búgingi kúni elimizde ımamdyq etip júrgen din qyzmetkerleriniń birshama bóligi Saýd Arabıasynda bilim alǵan bolatyn. 

Sondaı-aq, osy elde jyl basynda terorızm aıybymen ustalǵan  33 adamnyń ishinde bir Qazaqstan azamaty da tutqyndalǵan edi. Qazaqstanda bıylǵy jyly Almaty men Aqtóbe qalasynda bolǵan teraktten keıin, Saýd Arabıasynan din atyn jamylyp elge kelýshilerge qatań baqylaý ornatý aıtylǵan edi.