Búgin, 11 qarashada, Atyraý oblysynyń ákimi Nurlan Noǵaev Nıderland koróldiginiń Qazaqstandaǵy, Tájikstandaǵy jáne Qyrǵyzstandaǵy tótenshe jáne ókiletti elshisi Dırk Ian Koppen kezdesti.

Kezdesý basynda elshi myrza oblys ákimine orys tilinde suhbattasýdy usyndy. Nurlan Noǵaev bul usynysty qabyl almady.

"Biz Qazaqstandamyz ǵoı. Mysaly, men Nıderland eline barar bolsam, qasyma goland tilinde sóıleıtin aýdarmashyny ertip aparamyn, sondyqtan, qazir qazaq tilinde áńgimelesýge múmkindigińiz bolmasa, keleside qazaqsha sóılesýge keliseıik", – dedi Nurlan Noǵaev.

Kezdesý barysynda Dırk Ian Kop Nıderland koróldiginiń Atyraý oblysymen qarym-qatynasty nyǵaıtýǵa múddeli ekendigin aıtty.

"Atyraý oblysy ınvestısıa quıýǵa óte qolaıly aımaq. Sondyqtan, bizdik kompanıalardyń osynda jumys istep, eki tarapqa da paıda keltirýlerine múddelimiz", - dedi elshi.

Aıta ketelik, 2016 jyldyń alǵashqy toǵyz aıyndaǵy kórsetkish boıynsha, oblys pen koróldik arasyndaǵy saýda aınalymy 1,5 mıllıard dollar bolǵan. Oblysta qazir golandıalyq kapıtaldyń qatysýymen 96 kásiporyn tirkelgen.

Atyraý oblysynyń ákimi Nurlan Noǵaev Atyraý oblysynda Elbasynyń aıqyndap bergen saıasatyn ustaný arqyly ınvestorlarǵa barynsha jaıly jaǵdaıdyń jasalyp jatqanyn aıtty.

 "Investorlarǵa jan-jaqty qoldaý bildirýge daıynbyz. Qarym-qatynasymyzdy odan ári nyǵaıta túsý úshin barlyq múmkindikti paıdalanamyz", - dedi aımaq basshysy.

Aıta ketelik, qazir Atyraý oblysyndaǵy "Ulttyq ındýstrıaldyq munaı-hımıalyq tehnoparki" arnaıy ekonomıkalyq aımaǵynda 14 qatysýshy jobalaryn júzege asyryp jatyr. Aımaqta ınvestorlar úshin salyqtyq, kedendik jáne basqa da jeńildikter bar.