Esik qalasynda toptasyp qyz zorlady degen kúdikpen qamaýǵa alynǵan 4 jigit óz kinálaryn áli de moıyndamaı otyr. Sebebi, olar jábirlenýshi Jibek Mýsınovanyń kelisimimen jynystyq qatynasqa tústik deıdi. Sondyqtan bul áreketterin qylmys dep sanamaıdy eken. Soǵan qaramastan olar endi 11 jylǵa sottalýy múmkin. Sebebi, sotta prokýrorlar tórteýine de osyndaı aýyr jaza kesýdi surady.
Bul týraly Ktk arnasy habarlaıdy.
Almaty oblysynyń Esik qalasyndaǵy atyshýly qyz zorlaý oqıǵasyna qatysty sot prosesi aıaqtalýǵa jaqyn. Sondyqtan bolar, osy kúnge deıin kóptiń kózinen tasada júrgen kúdiktilerdiń týystary da typyrshı bastady. Sebebi, uldarynyń uzaq merzimge sottalyp ketýinen qaýiptengen ata-analar tergeý qorytyndysyna kóńilimiz tolmaıdy deıdi. Óıtkeni jábirlenýshi Jibek Mýsınovany tórt jigittiń toptasyp zorlaǵany qısynǵa kelmeıdi dep otyr. Iaǵnı ustalǵandardyń biri qyzdyń kelisimimen jynystyq qatynasqa túsken eken. Sondyqtan istiń qaıta tergelýin talap etýde.
Tolqyn Shormanova:
-Bir adamnyń ótirik aıtqany úshin sottaı ma? Men qazir baryp meni zorlady dep kez-kelgen adamdy kórsetem sony sottaı ma?
Jibek Mýsınovanyń zorlanǵanyn jurtqa jaıǵan onyń anasy bolatyn. Gúlbadar Mýsınova otyz jastaǵy qyzynyń aıaýsyz zorlanǵanyn aıtyp áleýmettik jelide vıdeoúndeý jarıalaǵan. Osydan keıin is qoǵamdyq daý týdyryp, artynsha tórt jigit qamaýǵa alyndy. Sodan beri úsh aı ótse de, aıyptalýshylardyń týystary tynyshtyq berer emes deıdi jábirlenýshi.
Jibek Mýsınova, jábirlenýshi:
-Men qazir qatty qorqamyn. Sebebi zorlyqshylardy qoldap júrgen jigitter maǵan qoqan-loqqy kórsetýde. Eger tórteýi sottalyp ketse kóreseni kórsetemiz dedi. Sondyqtan ózim ǵana emes otbasym úshin de alańdaımyn.
Osyndaı qorqytyp-úrkitýlerden keıin jábirlenýshiler sotqa jalǵyz kelýden qorqyp qalypty. Sondyqtan Jibek Mýsınovanyń jaqtastary proseske plakat ustap kelgen. Zorlyq-zombylyqqa jol joq dep urandatqan jastar Jibektiń basyndaǵy jaǵdaıdyń qaıtalanbaýyn talap etýde.
Al aıyptalýshy tórt azamattyń taǵdyry kelesi aptada sheshiledi. Prokýror olardyń árqaısysyn 11 jylǵa sottaýdy surady. Endi sýdıanyń qandaı úkim shyǵaratyny 15-shi qarashada belgili bolmaq.
