«Qamshy» portaly 14 qarashada taratqan aqparatynda 29 qazanda Almatyda ótken Qanat Islam jekpe-jegine qatysty «eldi jańyldyrǵan bes derek» týraly belgili sport jýrnalısi Rýslan Medelbektiń jazbasyn jarıalaǵan bolatyn.

Buǵan baılanysty qalyń oqyrmannan jaǵymsyz pikirler túsip, jazba avtory men portalymyzdy synap jatqandar tabyldy. Biz qazaq namysyn qorǵap júrgen batyrymyz Qanat Islamǵa asa jankúıer oqyrmandarymyzdyń peıiline alǵysymyzdy bildire otyryp, ol jazbadaǵy máseleniń mánin túsindire ketýdi jón kórdik.

Almatyda ótken Qanat Islam men Patrık Aloteı arasyndaǵy jekpe-jek mańyndaǵy daýǵa baılanysty Qazaqstan kásipqoı boks federasıasynyń vıse-prezıdenti Vıktor Demánenko tómendegideı málimdeme jasady:

 «Almatyda Islam men Aloteı arasynda ótken jekpe-jek aıasynda tarap jatqan qaýesetterge baılanysty túsinikteme bereıin. Birden aıtaıyn, Qazaqstan kásipqoı boks federasıasy óz mısıasyn tolyǵymen 100 paıyzǵa atqaryp shyqty. Degenmen 2016 jyly 29-qazanda osy jekpe-jekti uıymdastyrýshy «Nelson Promoýshen» kompanıasy Federasıany boksshylar qoldanǵan qolǵaptardyń sapasyzdyǵyn ıaǵnı jaramaıtynyn aıtyp, jala japqan bolatyn. Negizinen, bokstaǵy zańdylyqqa saı jekpe-jekti uıymdastyrýshy promoýter barlyq boksshyǵa qolǵaptardy taýyp berýi tıis, sonymen qatar qoldary jaraqat almaýy úshin tıtýl úshin talasatyn boksshylarǵa sapaly qolǵaptaryn berýi tıis» — dedi Vıktor Demánenko.

Belgili bolǵandaı, osyǵan deıin jekpe-jekten soń Qanat Islamnyń jaraqat alǵan qolynyń sýretteri jelide jarıalanǵan bolatyn. Demek, boks qolǵaby sapasyz bolǵany ras. Bul — uıat bolǵan birinshi jaıt.

Ekinshiden, ózin Qanat Islamnyń menedjeri dep tanystyrǵan Nurǵazy Ismaǵambetov te Qazaqstan boks federasıasy jekpe-jek ótkizilgennen keıin kezdesý qorytyndysy BoxRec-te jarıalamaǵanyn aıtyp, sol sebepti WBA Qanat Islamnyń WBA-Fedelatin tıtýly úshin judyryqtasqanyn moıyndamaǵan dep kiná taqqan bolatyn. Buǵan qatysty Federasıa basshysy bylaı degen:

«Bul jerde aıta ketý kerek, barlyq kezdesýdiń qorytyndysy BoxRec-ke jiberilgen, sol keshte-aq birden kesh qorytyndylary men Qanat Islam qorǵamaq bolǵan WBA-Fedelatin vakanttyq tıtýl da jarıalanǵan. Alaıda birneshe kún ótkennen keıin, 3-qarashada WBA saıtynda Qanat Islamnyń WBA aımaqtyq tıtýldar boıynsha birde-bir jekpe-jegi bolmaǵan, sonyń ishinde Fedelatin úshin de dep, sol úshin BoxRec-ten ol tıtýldy alyp tastady».

Bul arada kóp túsinbestiktiń oryn alǵany anyq. Ony Qazaqstan boks federasıasy bylaı tarqatady.

««Nelson Promoýshen» WBA-Fedelatin-nen alǵan sanksıany oqymaǵan sekildi, al onda Qanat Islam qorǵady degen tıtýl onyki emes ekeni, ol vakantty tıtýlǵa aınalǵany anyq kórsetilgen. Sol sekildi osy machqa deıin Qanat tıtýldyq emes 2 jekpe-jek ótkizgen. Mine, osy jumystar týraly onyń komandasy WBA-Fedelatin habardar etip, osy jekpe-jekti ótkizýge ruqsat alýy kerek bolǵan. Eger ondaı ruqsat alynbasa, 6 aıda tıtýl qorǵalmasa onda bokser óziniń ıeligindegi ataqtan avtomatty túrde aıyrylady. Iaǵnı, «Nelson Promoýshen» WBA-Fedelatin tıtýly qorǵalatynyn jarıalaýda olar federasıany da, kórermenderdi de aldaǵan. Qanatty osyndaı belbeýge ıe dep. Menińshe, bul jekpe-jekti esepke almaǵan sekildi, óıtkeni WBA-Fedelatin bekitken sýpervaızer men tóreshi kelgen joq, tek WBA ókilderi ǵana qatysty. Bul arada «Nelson Promoýshen» aqshasyn únemdep, WBA-Fedelatin salǵan sanksıany tólemegen, al WBA BoxRec-te jarıalanǵan bul aqparatty kórip, tıtýldy saıttan alyp tastaǵan dep oılaımyn.

Men kishi jáne úlken Nelsonmen de qolǵap sapasy jáne tıtýldyq jekpe-jek sanksıasy týraly sóılesken bolatynmyn. Olar eshteńege alańdaýdyń qajeti joq, barlyǵyn retteımiz dedi. Menińshe, olar Qazaqstanǵa bir shalǵaıda eshqandaı damýy joq aýylǵa, jaýapsyzdyqtary kórinbeıtin sekildi kele salǵan.

Men boks súıer qaýymnyń bul jekpe-jektegi taraptar jaýapsyzdyǵynyń Qazaqstan boks federasıasyna arta salǵysy kelip jatqanyn jetkizip, ony durys túsiner dep úmittenemin. Biz qazir WBA-Fedelatin resmı saýal joldadyq, tıtýldy jekpe-jekti nege esepke almaǵanynyń naqty deregi taıaýda belgili bolady».