Qarashanyń 18 kúni Almaty qalasy, Ó.Joldasbekov atyndaǵy stýdentter saraıynda El táýelsizdigi men «Qazaq kóshiniń» 25 jyldyǵyna oraı «Kósh jáne Kóshbasshy» merekelik konserti ótedi. Osy keshte QR Eńbek sińirgen ártisi Ramazan Stamǵazıev óner kórsetpek. Atalǵan kesh týraly Ramazan Ómiráliulynyń shaǵyn suhbatyn nazarlaryńyzǵa usynyp otyrmyz.
— Ramazan aǵa, aldaǵy juma táýelsizdigimizdiń 25 jyldyǵy, atajurtqa mıllıon qazaqty qosqan 25 jyldyqqa arnalǵan úlken merekelik kesh ótkeli jatyr. Osy keshtiń mańyzdylyǵy jaıly ózińizdiń pikirińizdi bilsek dep edik?
— Bul el tarıhynda aty altyn árippen jazylatyn úlken mereıli toı. Egemendikke qol jetkizgen shaǵymyzda taǵdyrdyń qatal jazýymen kezinde shekara asyp ketken qandastarymyzǵa qushaǵymyzdy ashtyq. Týǵan jerin ańsap ótken babalardyń urpaǵy ata amanatyn arqalap qazaq jerine tútin tútetýge keldi. Qandastarymyzben birge qazaq jerine salt-dástúr, ulttyq salt-sana, ulttyq bitim-bolmys ta oraldy. Sondyqtan bul mereıtoı qazaqtyń rýhanı jańarýynyń toıy dep qabyldasaq qatelespespiz.
"Kósh jáne kóshbasshy" merekelik konserti Qoja Ahmet Iassaýı babamyzdyń 850 jyldyǵy, keshegi Qazaq handyǵynyń 550 jyldyǵy, Alash qozǵalysynyń 100 jyldyǵy mereıtoılarynyń jalǵasy. Ári el ishinde ótkizilip jatqan mádenı-saıası is-sharalardyń qorytyndysy ispetti. Sebebi konsert eldikti oıatý, namysty qaıraý, rýhanı serpilis ákelý, ótken-ketken dúnıelerge kóz júgirtý jáne oı baǵamdaýdy maqsat tutady.
— Qazaq kóshi tórtkúl dúnıege tarydaı shashylǵan barsha qazaq úshin esten ketpeıtin uly kósh. Qıyrda júrgen qazaqty Otanyna qaıtaryp, týǵan jerimen tabystyrdy.
— Keregemiz keńeıdi. Atap aıtqanymdaı, jutylyp bara jatqan sonaý túkpirdegi barsha bizdiń ulttyq qundylyqtar oraldy. Qazaqtyń sany kóbeıdi. Jatta júrgen baýyrlar týǵan jerdiń topyraǵymen tabysty. Myńdaǵan qazaqtyń júregindegi arman-sheri, saǵynyshy basyldy. Sondyqtan, aldaǵy juma kúni ótetin keshke barsha qazaq balasy kelse deımin. Bul kesh burynǵy keshterden ózgeshe! Bul keshte qazaqtyń dombyrasyn kúmbirletip, keshegi babalardyń ánin aıtyp, jyryn jyrlap, shyn júrekten eldigimiz, erligimiz úshin qýanamyz!
Suhbattasqan: Aıjan Baqdáýletqyzy
