Tuńǵyshbaı Jamanqulov keltirgen shyǵynyń bir bóligin qaıtardy. Bul týraly búgin QR Parlamenti Májilisiniń jalpy otyrysynan keıin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov osylaı málim etti, dep habarlaıdy QazAqparat.

Osyǵan deıin Jamanqulov shyǵyndy ishinara ótegendigi habarlanǵan edi, bul turǵyda Qojamjarov akterdiń tólegen qarjysyn naqtylap ótti. Agenttik basshysynyń sózine qaraǵanda, búginde Tuńǵyshbaı Jamanqulov 6 mln. teńgege jýyq qarjyny qaıtardy. Sonymen qatar «Qazaqfılm» aldyndaǵy barlyq bereshegin tóleıtindigi týraly mindettemeni ózine alyp otyr. Eske sala keteıik, kúdikti retinde ustalǵan tanymal akter kepilzatpen bosatylyp, qazirgi kezde Tuńǵyshbaı Jamanqulov úıinde. Budan buryn habarlanǵandaı, qarasha aıynyń basynda «Jamanqulov óz kinásin moıyndady» degen aqparat taraǵan bolatyn. Ol 2 qarashada qarjyny jymqyrdy degen kúdikpen ustaldy. Tergeý «Qazaqfılm» AQ fılmniń bastapqy ázirlik jáne daıyndyq kezeńderine «T.K.Turan Universal Business» JSHS-na 79 mln teńge bólgenin anyqtady. Bul somanyń 69 mln teńgesin onyń quryltaıshysy bolyp tabylatyn «T.K.Turan Universal Business» JSHS arqyly kartınanyń bas prodúseri Tuńǵyshbaı Jamanqulov jymqyrǵandyǵy habarlandy.