Uzynaǵashqa mal satýǵa kelgen aǵaıyndy úsh azamatty óltirdi degender ómir baqı bas bostandyqtarynan aıyrylýy múmkin. Sottalýshylarǵa qatysty qozǵalǵan qylmystyq is barysynda olarǵa qarastyrylǵan eń aýyr jaza osyndaı bolyp otyr.
Saǵat 12 de bastalý kerek sot otyrysy tek 1 saǵattan keıin ǵana bastaldy. Alǵash bolyp suraqtarǵa jaýap bergen jábirlenýshi tarap áý bastan qylmyskerlerge qatysty óz pikirlerin ashyq bildirip jatty.
Bul týraly 31 arna habarlaıdy.
TURSYN ÁMİRBAI, Jábirlenýshi:
- Osy qylmystyń túbi túbine deıin anyqtalýyn, zańnyń eń joǵarǵy jazasyn alýyn, ótkende on adamdy atqan adamdy atatyn boldy, Myna sumyraıdyń kózin qurtyp qara jerge kómýin talap etemin!
ERKİN BEISEKEI, Jábirlenýshi:
- Sonda biz munda óleıin dep keldik pa, bir ıtterdiń qolynan? Bizdiń memleketke ókpemiz joq. Bul sıaqty shirik jumyrtqalardy atý kerek! Qyz zorlaǵanmen osy sıaqty ıtterdi atý!
Sondaı aq sot prosesi barysynda sottalýshylardyń advokaty jábirlenýshilerden bir suraqty birneshe ret qaıtara surap, sozbaqqa saldy. Al sottalýshylardyń ekeýi, Murat Ońalbaev jáne qylmysty kóre tura esh jerge habarlamady degen Baıqasymov ózderin kináli dep sanamaıdy. Osy ýaqytqa deıin qylmystyń keı baptarymen kelispeımin degen Talǵat Súleımenov bolsa, qylmysqa tek jartylaı ǵana qatysym bar dep saldy.
- Kinálimin dep sanaısyz ba ózińizdi? - Jartylaı moıyndaımyn. - Qalaı ol sonda? - Mashınany jaqty sosyn arqaısysyn ar jerde atty degeni, ol durys emes. Ol jerde túsinsipeýshilik, eregis týyndady.
Jábirlenýshi tarap sottan materıaldyq shyǵyn retinde marqum bolǵan azamattardyń otbasylaryna 15 mıllıon teńgeden barlyǵy 45 mıllıon teńge óndirip berýdi talap etip otyr.
Eskere ketetin másele, búginde marqum týystaryna joǵalǵan 41 bas maldyń tolyqtaı qujattary jáne 36 iri qara qaıtarylǵan. Qazir izdeýdegi 5 basty sottalýshylar satyp jiberdik degenimen olardyń qujattary jábirlenýshilerdiń qolynda. Al maldardy qujatsyz satý múmkin emes, olardy kúdiktiler ózderiniń sybaılastarynda tyǵyp otyr deıdi marqum týystary.
