«Táýelsizdiktiń dámin ár turǵyn seziný kerek» degen Aqtóbe oblysynyń ákimi Berdibek Saparbaev oblys deńgeıinde úlken qaıyrymdylyq sharasyn uıymdastyrdy. El táýelsizdiginiń 25 jyldyǵyna arnalǵan «Meniń elim – Máńgilik el!» el aksıasy muqtaj jandarǵa kómek kórsetýge úndedi.Bul týraly NUR.KZ jańalyqtary jazdy.
BAQYTGÚL QALIEVA. FOTO: NUR.KZ
Oblys ákimi qaırymdylyq sharasynda tek qatysýshy bolyp júrgen aqtóbelik sheneýnikterge eskertý jasady. Qaıyrymdylyq jáshikterinde jatqan tıyndarǵa kóńili tolmaı qaraǵan ákim:
«Bul jerge basshylar bastap salý kerek emes pe?»,- dep árbir jáshikke 10 myń teńgeden salyp ketti. «Júrekten júrekke» dep qaıyrymdy iske úndegen qorjyndarǵa oblys ákiminiń eskertýinen keıin ǵana qomaqty qarjylar túse bastady.
Mektep oqýshylarynyń qol óner buıymdary az aqshaǵa baǵalanyp, túsken qarjy kómek kórsetýge joldandy. Osyǵan deıin mektep dırektorlary az qamtylǵan otbasy balalaryna jyly kıimder úlestirgen bolatyn.
Sharaǵa oblystaǵy kómekke muqtaj jandar shaqyrylyp, sertıfıkattar tabystaldy. Oblys ákimi jetim balalar úıinde tárbıelengen memlekettik qyzmetkerge 2 bólmeli páterdiń kiltin berdi.
«Men balalar úıine 5 jasymda keldim. Keıin oblystyq jasóspirimder úıinde turdym. 11-synypty bitirgennen keıin zań kolejine oqýǵa tústim. Jumysqa kirip, baspana alý úshin aqsha jınadym. Oblys ákimi úı alýǵa jetpegen 1 mıllıon 500 myń teńgeni esepshotyma aýdaryp, 2 bólmeli baspana tabys etip otyr. Qasymda muǵalim bolyp isteıtin ápkem men stýdent sińilim bar. Endi biz birge turatyn bolamyz»,- deıdi Baqytgúl Qalıeva.
Baqytgúl oblystyq mamandandyrylǵan sotta keńse qyzmetkeri bolyp eńbek etedi.
«25 jyldyqty elimizdiń árbir azamaty seziný kerek. Ásirese, qamqorlyqty qajet etetin kisilerge qoldaý kórsetýge tıispiz. Aramyzda myńnan asatyn jarymjan balalar bar. 2 myńnan asatyn jetim balalar bar. 7 myńǵa jýyq nashar turatyn otbasylar bar. Biz olardyń bárine kómektesemiz. Jyl sońyna deıin muqtajdyqty qajet etetin birde bir otbasyn kómeksiz qaldyrmaımyz. Men barlyq aqtóbelikterdi osy aksıany qoldaýǵa shaqyramyn», - dedi oblys ákimi.
"Adam ómirde alǵys alyp júrý kerek. Alǵys alǵan adam jaman bolmaıdy. Mundaı sharalar tek Aqtóbede ǵana emes, Qazaqstanda jalǵasyn tabady dep oılaımyn. Qazaqstannyń árbir azamaty qamqorlyqty seziný kerek. Mine, sonda bizdiń damyǵanymyz", -dedi Berdibek Saparbaev.
Shara kezinde qarjydan qysylyp, úıine gaz kirgize almaı otyrǵan aýyl turǵyndaryna da kómek kórsetildi.
