Uzynaǵashta óltirilgen Qadylbek Álimhanulynyń ákesi Álimhan Ajdan aǵaıyndy úsh jigitti óltirgender sany eki adamnan da kóp bolýy múmkin deıdi. Bul týraly  Qamshy.kz habarlaıdy.

Almaty oblysy Jambyl aýdanynda aıýandyqpen óltirilgen úsh azamattyń isi boıynsha sot prosesi bastalǵanyn buǵan deıin habarlaǵan bolatynbyz. Qaskeleńde ótip datqan sotqa Qadylbek Álimhanulynyń ákesi Álimhan QajydarÚrimjiden arnaıy kelip, sotta kýá retinde jaýap berdi. Á. Ajdannan kýá retinde jaýap alý týraly ótinishti jábirlenýshi tarap bergen.  

Sózin: «Men Úrimjiden arnaıy keldim. Kempirim naýqas. Bárimiz qan jutyp otyrmyz. Myna qylmys tek bizdiń áýletke ǵana emes, tutastaı qoǵamǵa keri áser etti», - dep bastaǵan Qadylbek Álimhannyń ákesi qylmysqa qatysty kúdiginiń kóp ekenin aıtty.

«Bul jendetter tek eki adam bolmaýy múmkin. Myna ekeýi óltirilgen úsh azamatty bıik kóliktiń ústine shyǵara alady dep oılamaımyn. Odan keıin qylmysqa kúdiktilerdiń bireýiniń áıeliniń de qatysy bar dep oılaımyn. Óıtkeni, mal solardyń úıinen tabyldy. Maldy úıine jasyrǵan ǵoı. Aıdos degenge de kúdik kóp», - deıdi qaza tapqan azamattyń ákesi.

Sondaı-aq, búgingi sot otyrysynda qylmysqa qatysy bar dep aıyptalǵan kúdikti Murat Ońalbaevtan da jaýap alyndy. Buǵan deıin negizgi kúdikti Talǵat Súleımanov sotta oqıǵa ornynda úsh azamatpen sózge kelip, ereges bolǵanyn, tóbeles bolǵanyn, sol kezde olarǵa oq atqanyn aıtqan edi. Bir aıta keterligi, T. Súleımanovtyń advokaty tergeý barysynda oqıǵanyń hronologıasyn basqasha baıandaǵan edi.

Adovkat Merkebek Mákenbaev kúdiktilerden alynǵan jaýap boıynsha, oqıǵanyń hronologıasy bylaı órbigenin aıtqan bolatyn:

«17 qyrkúıekte Súleımanov Uzynaǵashtaǵy mal bazaryna barady. Ol mal sharýashylyǵymen aınalysady. Senbiden jeksenbige qaraǵan túni bazarda ádette adamdar kópter jınalady: bireý mal ákeledi, ekinshisi oryn alyp qoıady. Osylaısha meniń qorǵalýshym da sol kúni bazarǵa kelip, óziniń 2-3 buzaýyn satady. Keıinnen Súleımanov eki kólikpen mal ákelgen aǵaıyndylardy kórip, olarmen saýdalasa bastaıdy. Súleımanov 16 bas sıyr satyp alady», - degen bolatyn advokat.

Alynǵan taýar úshin kúdikti Súleımanov satýshylarǵa 2 mıllıon teńgeden asa aqsha beredi. Sodan kúdiktiler aǵaıyndylardyń júk kóligimen maldardy Suranshy batyr aýylyna aparady. Jolda Súleımanov óziniń aýyldasy Ońalbaevqa habarlasyp, odan maldardy kólikten shyǵarýǵa kómektesýin suraıdy. 28 qyrkúıekte shamamen saǵat 13.00-de olar Súleımanovtyń úıine kelip, maldardy sonda qaldyrady. Aıta keteıik, olar aǵaıyndylardyń 36 malyn satyp alamyz dep kelisken eken.

«Sodan Súleımanov olardy aldap, 20 maldy onyń taý jaqta turatyn týysy alǵysy keletinin aıtady. Sonda qalǵan aqshany beremiz dep kelisken. Olar aǵaıyndylarǵataǵy eki mıllıon 800 myń teńge tóleý kerek bolatyn. Osylaısha mal satýshylar kelisip, meniń qorǵalýshym ózimen birge vınchester alyp shyǵady. Aǵaıyndardyń «Nelikten qarý alyp shyqtyń?» degen suraǵyna Súleımanov onda qasqyrlar kóp dep, qarýdy qoıshylarǵa aparyp beretinin aıtqan», - degen Merkebek Mákenbaev.

Taýǵa barýǵa kelisken úsh aǵaıyndy men kúdiktiler osylaısha jolǵa shyǵady. Olardyń sońynan sur tústi Mercedes kóligin júrgizip kele jatqan Ońalbaev keledi. Taýdaǵy qoraǵa jaqyndaǵan boıda olar Sýly saı shatqalynyń aldyna baryp toqtaıdy. Sodan malshylar Kamazdan 12 maldy túsiredi. «Shatqalǵa jetkende Súleımanov qasyndaǵy er adamnyń arqasyna oq atady. Alaıda ol qulamaıdy. Sodan meniń qorǵalýshym ekinshi ret taǵy oq atady. Sodan er adamnyń máıitin alyp, shóptiń arasyna tyǵyp, ary qaraı kete beredi. Sol jaqta Súleımanov aǵasynyń mal qorasynda qalǵanyn aıtady. Shatqalda Talǵat Súleımanov ekinshi er adamdy atyp óltiredi. Osyny kórgen Murat oǵan bas salyp, osy qylmys úshin qamaýǵa alynatyndaryn aıtqan. Al Talǵat bolsa onyń bul aıqaıyna «Eger sen maǵan qazir kómektespeseń, seni de óltiremin" dep jaýap qaıtarǵan», - dedi advokat. Súleımanov Muratty qorqytyp, oǵan úshinshi er adamdy shaı ishýge shaqyrýyn buıyrady. Sodan Murat úshinshi er adam jaqqa qaraı bet burǵan bolyp, jolda jasyrynyp qalady. Birneshe ýaqyt ótken soń Súleımanovtyń ózi sol jaqqa qaraı baryp, tabıǵatty tamashalap júrgen úshinshi er adamdy kóredi.

«300 metr bıiktikte turyp, vıntovkamen úshinshi er adamnyń basyna oq atady. Sodan Muratty taýyp alyp, ony kómektesýge májbúrleıdi. Sóıtip ekeýi máıitterdi Kamazǵa salady. Múrdelerdi Kamazdyń ishindegi tezektermen jaýyp tastaıdy. Keıin jolǵa shyǵady. Alaıda júk kóligi jolda buzylyp qalady. Sodan olar Kamazdy sol jaqta tastap, úılerine qaıta beredi. Munyń barlyǵyn Súleımanovtyń ózi aıtyp berdi. Kinásin tolyqtaı moıyndady. Aǵaıyndylardy óltirgen soń qatty qınalǵanyn jáne dúısenbide ózi kelip, kinásin moıyndamaqshy bolǵanyn da aıtty. Sondaı-aq, ol úsh er adamdy 20 maldy tartyp alý úshin óltirgenin aıtty», - degen bolatyn advokat. Sonymen qatar, advokat kúdiktilerdiń bul qylmysty aldyn ala oılastyrmaǵanyn málimdegen.

Al, sotqa kelgende kúdikti Súleımanov basqasha sóılegen. Alaıda, búgingi sot otyrysynda jaýap bergen Murat Ońalbaev sybaılasynyń aıtqandaryn joqqa shyǵardy. Ońalbaev tergeý kezinde aıtqandaryn, ıaǵnı, qaza bolǵan jigitterdiń kúdiktilerge eshqandaı shabýyl jasamaǵanyn, eshqandaı tóbeles bolmaǵanyn qaıtalap aıtty. Sondaı-aq, M. Ońalbaev ózin T. Súleımanovtyń qorqytyp, qysym jasaǵanyn da qaıtalap aıtty.

Esterińizge salsaq, beısenbi kúni ótken sot otyrysynda qaza tapqan Jarqyn Doldanulynyń ákesi Doldan Ámirbaıuly da qylmystyń tergeý kezinde tolyq ashylǵanyna kúmándanatynyn aıtqan bolatyn. Marqumdardyń týystary úsh azamat joǵalǵannan bastap, olardy izdestirý, qylmysty tergeý barysyna kóńili tolmaıtyndyqtaryn, qylmysqa qatysy bar delingen kúdiktilerdiń keıbirine áldebireýlerdiń qysym jasaýy múmkin ekenin de aıtady.

Úsh azamattyń ólimi boıynsha búgingi sot otyrysynda qylmys bolǵan aımaqta ornalasqan shekara beketiniń áskerı qyzmetshilerinen de jaýap alyndy.

Atalǵan sot prosesiniń barysynan oqyrmandardy aldaǵy ýaqytta da habardar etetin bolamyz.  

Erlan Tóleýbaı