Kók bazar aýmaǵynda turǵyndardy san soqtyryp ketetin alaıaqtar men kóshe boıynan ótken eldiń mazasyn qashyratyn alypsatarlar azaımaı tur. Jyl basynan beri, polıseıler bazar mańynda tártip buzǵan 1600-ge jýyq adamdy ákimshilik jazaǵa tartypty. Olardyń qataryndaǵy 41-i makler bolsa, 100-den astamy telefon satqyshtar eken. Búgin Medeý aýdany ákimshiligi men tártip saqshylary Kók bazar aýmaǵyna kezekti reıd sharasyn júrgizip, zańsyz jumys jasaǵandardy anyqtady, dep jazady Almaty telearnasy.
Bul «jetim buryshty» jaǵalap, kóshe boıynan ótken jurttyń mazasyn qashyryp ártúrli páterlerin usynatyn maklerler. Salyq tóleýden jaltaryp kásipterin tirkemegeni óz aldyna, júrginshilerdiń jolyn jaýyp álek etedi. Polıseıler Kók bazar mańyn súzip shyǵyp, ózderine ruqsat etilgen jerde jumys jasamaı, trotýarda qyzmet usynyp turǵan maklerlerdi aýlady. Olar saqshylardy kórgen boıda tym-tyraqaı qashyp, qyzmetin jasyrýǵa tyrysty.
«Jetim buryshta» únemi jumys jasaıtyn 67 makler bar eken. Olardyń 31-i kásipterin tirkep zańdy túrde jumys jasasa, qalǵan 36-sy osylaı qashyp-tıip esh ruqsatsyz páter usynatyn kórinedi. Polıseıler 10 aı ishinde 41 maklerge 434 myń teńgeden astam aıyppul salypty. Soǵan qaramastan tártipke baǵynbaı, jol boıynan jurttyń aqshasyn qaǵyp, artynsha san soqtyryp ketetinderi azaımaı tur eken. Muny maklerlerdiń ózderi de moıyndap otyr.
«Bizde osy jerde maklerlar bar, dalada júredi olar. Elden adresti beredi, jiberedi, ol adres joq qaıtadan kelip aqshasyn alaıyn dese. Ol adam joq ýje vse. Ne aqshamdy ustap qoıdym, erteń kelesiń, búrsúgini kelesiń,- deıdi. Sol úshin ondaı adamdar dalada kóp bizde»,- dedi Makler, Nursıla Kabasova.
Maklerlardan bólek, jol boıynda toptasyp tura qalyp ótken-ketken adamǵa telefon usynatyn alypsatarlar da tártip saqshylaryn mezi etken. Jyl basynan beri, 113 adam polısıa bólimshesine jetkizilip, olardan 98 telefon tárkilenipti. Al, san márte eskertýge qulaq aspaǵan 11 telefon satqyshtyń isi tipti ákimshilik sotta qaralyp, olar 5 táýlikke qamaýǵa alynypty.
«Qoǵamdyq oryndarda zańsyz saýda jasaýǵa túbegeıli tyıym salynǵan. Saýdagerler ózderiniń isin zańdy túrde tirkep, arnaıy saýda oryndarynda jumys jasaýy qajet. Biraq, soǵan qulaq aspaıtyndar kóp. Biz óz tarapymyzdan olarǵa 449 baptyń, ıaǵnı qoǵamdyq orynda qorlap tıisý baby boıynsha ákimshilik jaza qoldanamyz. Salynatyn aıyppul kólemi 10 myń teńgeden bastalady»,- Almaty qalasy Medeý aýdany jergilikti polısıa bóliminiń basshysy, Rýslan Saýdabaev.
Medeý aýdanynyń shendileri Kók bazar aýmaǵyndaǵy jabaıy saýdanyń tamyryna balta shabýdy da myqtap qolǵa alýda. Bıyl munda ruqsat etilmegen jerde saýdasyn dóńgeletken 389 adam ákimshilik jaýapkershilikke tartylǵan. Kúndelikti júrgizilgen reıd nátıjesinde jyl basynan beri kók bazar mańynan 69 zańsyz saýda núktesi anyqtalyp, olardyń kózi joıylypty.
«Ótken aptada biz 12 reıd sharasyn ótkizip, 26 zańsyz saýda núktesin anyqtadyq. Esh ruqsatsyz, zańsyz jolmen saýda jasaǵan 12 adamǵa 204 bap boıynsha aıyppul saldyq. Aıyppul kólemi 159 myń teńgeni qurady",- dedi Almaty qalasy, Medeý aýdany ákiminiń orynbasary, Baqytjan Naýryzbekov.
Qalaı degenmen de qala aýmaǵynda zańsyz jolmen saýda jasaýǵa ruqsat joq. Sondyqtan, jergilikti bılik kók bazardyń mańyn retke keltirip, ondaǵy alypsatarlar men maklerlerdi tártipke shaqyrmaıynsha tekseristi toqtatpaýǵa bekinip otyr.
