Búgin Ortalyq komýnıkasıalar qyzmetinde 100 naqty qadam – Ulttyq josparynyń 56.2 qadam «3-4 eksporttyq qazaqstandyq brendterdi jasaý jáne ótkizý» taqyrybyna arnalǵan baspasóz máslıhatyn ótti.
Oǵan Investısıalar jáne damý mınıstrliginiń Indýstrıalyq damý jáne ónerkásiptik qaýipsizdik komıteti tóraǵasynyń orynbasary Tımýr Nurashev, «Analıtıkalyq ortalyq» JSHS bas dırektory Qaırat Sádýaqasov pen «Kaznext invest» AQ-nyń eksportty jyljytý departamentiniń dırektory Aısáýle Sýltanmuratova qatysty.
Brıfıńte atalǵan komıtet tóraǵasynyń orynbasary otandyq brendtti jasap, ony shetelge nasıhattaýda atqarylyp jatqan jumystar týraly aıtyp berdi. Onyń aıtýynsha, qazirgi kezde elimiz 118 memleketke taýardyń 970 túrin satýmen aınalysyp jatyr. Jylyna shamamen 200 myńnan asa otandyq ónim shetelge satylady.
–Búginde elimizde shetelge otandyq ónimderdi satýmen 1 800 eksporttaýshy jumys isteıdi. Olar turaqty túrde 1 mln AQSH dollarynnan asa paıda túsirip otyr, – dedi Tımýr Nurashev.
Sonymen birge ol aýyl sharýashylyǵy kesheninde elimizdiń betkeustar markalaryn jasaý úshin «Qazaq Organic Food», «Halal», «Et brendi» brendteriniń ázirlengenin aıtty. «Bul brendter belgili bir naryqqa baǵyttalǵan. Budan basqa biz elimizdiń atyn álemge tanytý úshin 10 kompanıany arnaıy tańdap aldyq. Qazirgi kezde olardyń ónimderine jaqyn jáne alys shetelder qyzyǵýshylyq tanytyp jatyr. Mysaly, elimizdiń et ónimderine Qytaı, Reseı, Taıaý Shyǵys pen Avstralıa sıaqty elderdiń suranysyna ıe. Al arab memleketterin halal ónimderi qyzyqtyrady. Árıne, arab elderine biz arnaıy tekserýden ótken ónimderdi jetkizemiz», dedi Tımýr Nurashev.
Baspasóz máslıhatynda «Analıtıkalyq ortalyq» JSHS bas dırektory Qaırat Sádýaqasov otandyq brendterdi jasaýdyń mańyzdylyǵy týraly aıtyp berdi. Ol elimizde jeńil jáne aýyr ónerkásipti damytý úshin brendter jasaý kerektigin, osynyń ózi álemge qazaqstandyq ónimdi nasıhattaýda jáne damytýda mańyzdy ról atqaratynyn aıtty.
–Qazirgi tańda Qazaqstan 50 iri eksporttaýshy elder qataryna kiredi. Elimiz táýelsizdik alǵan kezden beri shetelge ýran, un, bıdaı, munaı jáne basqa da ónimderdi satýmen aınalysýda. Al shıki munaı men et ónimderi jaqsy satylyp jatyr. Mysaly, bir Qytaıdyń ózi jyl saıyn elimizden 800 000 tonna sıyr etin alsa, elimiz shıki munaıdy satýmen aınalysatyn 10 memlekettiń qataryna kiredi, – dedi ol.
Qoryta aıtqanda, brıfıńke qatysýshylar otandyq brendti jasaýda jáne ony qoldaýda memleket tarapynan qolda bar múmkindiktiń jasalatynyn atap ótti.
