Atyraýlyq Anar atty kelinshek shetel azamatyna turmysqa shyǵyp, qaryzǵa belshesinen batqan. "Súıdim, kúıdim" dep qazaq qyzynyń artynan qalmaı, júregin jaýlap alǵan Pákistandyq azamattyń bar oılaǵany Qazaqtanǵa emin-erkin kiretin quzyry bar qujat bolyp shyqqan. Kúıeýine dep úsh nesıe alyp bergen áıel, redaksıamyzǵa arnaıy hat jazyp kómek surapty. Úndi eliniń ulttyq kıimin "ata-anam" berip jiberdi dep, syıǵa tartqan Pákistandyq azamat qazaq qyzynyń júregin osylaı jaýlaı bastapty. Jastardyń arasyndaǵy tanystyq ta tamasha bastalǵan. Anar ápkesiniń úıin jalǵa bermek bolyp habarlama jazǵany sol eken, sheteldik azamat kelip, turýǵa nıet bildiredi.
ANAR IFTIHAR:
Namaz oqıdy, araq ishpeıdi. Balammen til tabysyp, balam arqyly maǵan da jaqsy qarym-qatynasta boldy. Biraz ýaqyttan soń, eńbek vızasyn alýǵa eline ketken azamat kúzde qaıta oralady. Biraq Qazaqstanǵa qujatsyz kelgen jigit, kútpegen jerden Anarǵa degen kóńiliniń bar ekenin bildiredi. Kóp uzamaı týǵan-týystarynyń aq batasyn alǵan qazaq qyzy, qolyna neke saqınasyn taǵyp, Pákistandyq azamattyń jary bolyp shyǵa keledi. Tipti famılıasyn da aýystyrady. Otbasylyq ómirdiń qyzyǵy bastaldy ma degen shaqta, kúıeý jigit jańa usynys tastaıdy. Bul shetel azamattaryna bes jyl kóleminde Qazaqstan shekarasyna vızasyn emin-erkin ótýge ári turaqty meken-jaı alýǵa jol ashatyn qujat.
Kóp uzamaı, Anar kúıeýiniń qujattaryn rásimdeý úshin óz atynan úsh nesıe alyp beredi. Bul aralyqta áıeline jyly sózderdi jaýdyryp júrgen jigit, kópten kútken qujaty qolǵa tıisimen eline baryp kelmekke syltaý izdeı bastaıdy.
Bir aıdan soń, Anar "men senimen ajyrasamyn" degen mazmundaǵy hat alady. Osydan soń, Anar sheteldik azamattyń qazaqtyń qyzyna úılenýdegi maqsatyn túsingendeı bolady. Al artynan Atyraýǵa qaıta ushyp kelgen sheteldik kúıeý qazaqtyń qyzymen zań turǵysynan nekesin buzýdy oılaıdy. Aqyry bıylǵy jyldyń aqpanynda jup ajyrasyp tynady. Biraq kúıeýine dep alǵan úsh nesıeni Anar áli kúnge tólep keledi. Aldap ketken ol zań turǵysynda jazasyn alý úshin quzyrly organdarǵa shaǵym da túsiredi. Sot tyńdalymdary da bastalǵan. Biraq burynǵy kúıeýi kelmeı, qaıta - qaıta keıinge shegeriletin sottan Anardyń úmiti úzilgen.
Al Anardyń aıtýynsha, Pákistandyq azamat kásipteri bar ózge tanystarymen qazir Atyraýda emin-erkin júr. Biraq Iftıhar myrzany tappadyq.
31.kz
