Taýly aımaq - Túlkibasta almanyń «aport» sortyn ósirip júrgen sharýashylyqtardyń sany artyp keledi. Búgingi tańda aýdan kóleminde aport almasyn ósiretin alqaptardyń kólemi 200 gektarǵa jetti.

Aport almasyn ósirýdi aýdandaǵy «Kóktal», «Arsha»  sharýashylyqtary qolǵa alyp, jyl saıyn jańa baýlar otyrǵyzýda. Satylymda suranysqa ıe aport almasyn egýge basqa da sharýashylyqtar qyzyǵýshylyq tanytyp otyr. Jalpylaı aıtqanda, aýdandaǵy irili-usaqty 20 shaqty sharýashylyq jeńsik jemis túrin baptaýmen aınalysýda. Degenmen, baǵbandar, ázirge, ónim alǵan joq. Óıtkeni, jemistiń bul surypy ónimdi 7-8 jyldan soń beredi. Al túlkibastyq aporttardyń ósirilip jatqanyna 3 jyldan endi asty.

Aıta keteıik, jemisi iri keletin bir almanyń salmaǵy 500-600 gramǵa deıin jetedi. Al túsi alqyzyl bolyp keledi. Bul sorttyń jemisi qyrkúıek aıynda pisedi, qańtar aqpan aılaryna deıin erkin saqtaýǵa bolady.

Eske salaıyq, Túlkibas aýdany kezinde almanyń «aport» surypyn ósirýmen aty shyqqany belgili. Óıtkeni, jemistiń bul sortyn ósirý úshin tańdalyp alynǵan jer alqaby teńiz deńgeıinen 900 metrden joǵary bıiktikte bolýy shart. Al, Túlkibas aýdany osyndaı aımaqta ornalasqan óńir.