Ońtústik Qazaqstan oblysy, Saryaǵash aýdanynda búginde 1891 gektar júzim alqaby bar. Onyń ónim beretin 1648 gektarynan sharýalar bıyl 13184 tonna ónim alyp otyr. Bıylǵy ortasha ónimdilik gektaryna 80 sentnerdi quraǵan, dep habarlaıdy OQO ákimdiginiń baspasóz qyzmeti.

Jınalǵan júzimniń 4 313 tonnasy asqanalyq bolsa, 8871 tonnasy tehnıkalyq sorttar. Bıyl jyldaǵydan mol ónim alyp otyrǵandyǵyn aıtqan dıqandar jınalǵan 8871 tonna tehnıkalyq júzim sortyn aýdandaǵy «Caspian Food» JSHS-gi men «Semıreche» JSHS-niń sharap zaýyttaryna ótkizgenin aıtýda. Al qalǵan ónim ishki naryqqa jáne elimizdiń basqa oblystary men 500 tonnasy Reseı Federasıasyna jóneltilgen.

Ótken jyly 1648 ga júzim alqabynan 13 myń tonna ónim alyndy. Ortasha ónimdilik 79,2 sn/ga bolǵan.

Aıta keteıik, Ońtústik Qazaqstannyń taǵy bir aýdany  Túlkibasta almanyń «aport» sortyn ósirip júrgen sharýashylyqtardyń sany artyp keledi. Búgingi tańda aýdan kóleminde aport almasyn ósiretin alqaptardyń kólemi 200 gektarǵa jetken. Aport almasyn ósirýdi aýdandaǵy «Kóktal», «Arsha» sharýashylyqtary qolǵa alyp, jyl saıyn jańa baýlar otyrǵyzýda. Satylymda suranysqa ıe aport almasyn egýge basqa da sharýashylyqtar qyzyǵýshylyq tanytyp otyr. Jalpylaı aıtqanda, aýdandaǵy irili-usaqty 20 shaqty sharýashylyq jeńsik jemis túrin baptaýmen aınalysýda.