Búkil respýblıkaǵa «Aq altyn óndirý zaýyty» degen atpen tanylǵan Maqtaral aýdanynyń sharýalary sońǵy 10 jylda qaýyn-qarbyz ósirýmen de tanymal bola bastady. Búginde maqtaraldyq dıqandar qaýyn-qarbyz ósirýdi sheber meńgerip, baqsha daqyldarynyń eksportqa jaramdy neshe túrli sorttaryn jasap shyǵarýda, dep habarlaıdy OQO ákimdiginiń baspasóz qyzmeti.

Bir ǵana mysal, maqtaraldyq dıqandar bıyl 28 myń gektar jerden 610 myń tonna qaýyn-qarbyz alsa, sonyń 450 myń tonnasyn shet el naryǵyna shyǵarǵan. Bul gektarynan 263 sentnerden ónim alyp, ótken jylmen salystyrǵanda 25 sentnerge artyq qaýyn-qarbyz jınaǵan myrzashóldikter baqsha daqyldaryn ósirýden Orta Azıanyń kóshbasshysy ekendigin dáleldeıdi.

Maqtaraldyń baý-baqsha ónimderinen kól-kósir paıdany reseılik jáne belarýstik kásipkerler de kórip otyr. Ońtústikten jetken qaýyn-qarbyzdy osy teriskeıdegi kórshiler Batys Eýropa memleketterine tasymaldaıdy eken.

Máselen, reseılik bıznesmen Stanıslav Kasparov: «Maqtaraldy «Qaýyn-qarbyzdyń Otany» dep sanaımyz. Bul jerdiń qaýyn-qarbyzynyń dámi erekshe tátti. Sol sebepti, Máskeý men Mınsk qalalary osy jerdiń ónimine tapsyrys beredi. Biz osy jerden jetkizip turamyz», - deıdi bir suhbatynda.
Aıta ketý kerek, Orta Azıada Túrkimenstan, Tájikstan jáne Ózbekstan elderi qaýyn ósirýmen aınalysady. Degenmen, «Eýrazıalyq ekonomıkalyq Odaqtyń» arqasynda Maqtaral aýdanynyń sharýalary ónimderin Reseı men Belorýssıaǵa ońaı eksporttap, kedendik máselelerdiń bolmaýynyń arqasynda shet elderge jol tartýda.