OQO-da joǵary sapaly «túrkistan» maqta suryby shyǵaryldy. Mundaı jańalyq Túrkistanda dástúrli túrde ótetin «Aq kerýen» maqta terimi sharasy kezinde aıtylyp, jurtshylyqqa tanystyryldy. Osylaısha, Qarashyq aýyldyq okrýgindegi «Turan» sharýa qojalyǵynda ótken jıynǵa kelgen qatysýshylar, aldymen, maqta alqaptaryn aralaýdan bastady, dep habarlaıdy OQO ákimdiginiń baspasóz qyzmeti.

Bıologıa ǵylymdarynyń doktory A.Sultanov pen Aýyl sharýashylyǵy ǵylymdarynyń kandıdaty Á.Álıev sorttardyń erekshelikteri týraly áńgimelep berdi. Ereksheligi sol, bul maqta talshyǵynyń uzyndyǵy kádimgi suryptaǵy maqtaǵa qaraǵanda áldeqaıda joǵary. Iaǵnı, «Túrkistan» maqtasynyń talshyǵy 4-úlgige jatady. Maqtanyń bul túri toqyma ónerkásibinde keńinen paıdalanylady. Endi túrkistandyq kásipkerler Ońtústiktegi toqyma kásiporyndaryn jergilikti shıkizatpen qamtýǵa tolyq kepildik bere alady.

Túrkistandyq maqtashylar bıyl 17 myń tonna shıtti maqta jınaýǵa nıetti. Qala ákiminiń orynbasary T.Musaevtyń aıtýynsha, Túrkistanda ótken jyly 3500 gektar jerge maqta egilse, bıyl bul kórsetkish 6600 gektarǵa ulǵaıǵan.

Al maqtaraldyq dıqandar bıyl 28 myń gektar jerden 610 myń tonna qaýyn-qarbyz alsa, sonyń 450 myń tonnasyn shet el naryǵyna shyǵarǵan. Bul gektarynan 263 sentnerden ónim alyp, ótken jylmen salystyrǵanda 25 sentnerge artyq qaýyn-qarbyz jınaǵan myrzashóldikter baqsha daqyldaryn ósirýden Orta Azıanyń kóshbasshysy ekendigin dáleldeıdi.