Ońtústik Qazaqstan oblysynyń ákimi Janseıit Túımebaev Saıram aýdanyna qarasty Aıteke bı aýylyndaǵy «Dala-frut.kz» JSHS-niń (Green Land) jemis baýyn tamashalady.

Ony soǵý úshin kásipker «Bıznestiń jol kartasy 2020» baǵdarlamasynyń sýsıdıalaý baǵyty boıynsha qoldaý alyp otyr. Sondaı-aq, bolashaqta 7 ga jerge qıar men qyzanaqqa arnalǵan jylyjaı salýdy josparlap qoıǵan. Bul rette, aımaq basshysy atalǵan qarqyndy baýdyń jumys tájirıbesimen ózge de aýdandardyń tanysýy qajettigin alǵa tartyp, mundaǵy sheteldik kóshetterdi ondaǵy sharýalar da egýi kerektigin aıtty. Jumys sapary barysynda Janseıit Qanseıituly jumys tártibindegi jospardan tys Saıramnyń Qarabulaq aýylyna qarasty Ulyqbek atyndaǵy №81 mektepte boldy. Ondaǵy jylý júıesiniń qanshalyqty deńgeıde jumys istep jatqanyn baqylaǵan ákim elektr qýatynyń úzdiksiz berilip jatqanyna kózin jetkizdi. Aqsýkent aýylyndaǵy Kásipkerlerge qyzmet kórsetý ortalyǵynyń jumysy da oblys basshysynyń nazarynan tys qalǵan joq. Shaǵyn jáne orta bıznesti damytyp, aýdandaǵy kásipkerliktiń kókjıegin keńeıtý kerektigine toqtalǵan aımaq basshysy júıeni ońtaılandyrýdy júktedi. Sondaı-aq, ol ortalyqta túrli is-sharalar ótkizýdi tapsyrdy. Sapar sońynda J.Túımebaev Saıram aýdanynyń aktıvimen kezdesip, aýdan basshysy Samat Saparbaevtyń 9 aıda atqarǵan jumystarynyń barysyn tyńdady. Saıramnyń áleýmettik-ekonomıkalyq damý kórsetkishteri aıtylǵan jıynda aldaǵy jylǵa mejelengen jospar jaıy da málim etildi. Keltirilgen málimetterdi muqıat tyńdaǵan óńir basshysy birqatar salalar boıynsha aýdan basshylyǵyna syn, eskertpeler aıtty. Ásirese, Saıramnyń tazalyq máselesine kóńili tolmaǵan J.Qanseıituly oblys ortalyǵy - Shymkentke jaqyn ornalasqan aýdan retinde Saıram aýdanyn qoqystan tazartýdy júktedi. Sonymen birge, jer qoınaýyn paıdalaný jumystaryn retke keltirýdi tapsyrdy. Memlekettik baǵdarlamalardyń oryndalýy boıynsha aýdan kórsetkishi tómengi deńgeıde ekenin aıtqan ákim árbir memlekettik qyzmetker óz mindetine jaýapty bolýy kerektigin eskertti.