Ońtústik Qazaqstan oblysynyń ákimi Janseıit Túımebaev jumys saparymen Saıram aýdanynda bolyp, birqatar sharýashylyqtardyń jumysymen tanysty, dep habarlaıdy oblys ákimdigingiń baspasóz qyzmeti.

 Eń aldymen, ákim aýdannyń Qaınarbulaq aýyldyq okrýgindegi «Qaıyp-Ata» JSHS-ne baryp, et kombınatyn aralady. Et óndirip, ony býyp-túıýmen aınalysatyn seriktestikte 30 adam jumyspen qamtylǵan. Jylyna 320 tonna et óńdeýge qaýqarly kombınatta táýligine 300 bas iri qara soıylady. Qojalyq basshylyǵy kelesi jyly kásiporyndy keńeıtip, et óńdeıtin qural-jabdyqtar qoıý arqyly shujyq ónimderin shyǵarýdy josparlap otyr. Sharýashylyqtyń mán-jaıyna qanyq bolǵan Túımebaev Saıramǵa jaqyn aýdandarda bordaqylanǵan tórt túlikti atalǵan et kombınatynda soıyp, jumysty ortalyqtandyrý týraly tapsyrma berdi. Aıta keteıik, «Qaıyp ata» JSHS-i mal bordaqylaý alańy retinde 2011 jyly Qazyǵurt aýdanynan ashylǵan sharýashylyq. Bastapqyda 1 myń bas iri qarany bordaqylaǵan qojalyqta búgingi tańda 3 myń bastan astam mal bar. Qys mezgiline deıin mundaǵy iri qaranyń basyn 5 myńǵa jetkizý josparlanyp otyr. Munan soń, óńir basshysy Aıteke bı aýylyndaǵy «Dala-frut.kz» JSHS-niń (Green Land) jemis baýyn tamashalady. 100 gektardan astam jerge úsh jyldan beri alma jáne qara órik jemisteriniń kóshetteri egilgen. Baqqa zamanaýı qural-jabdyqtarmen jabdyqtalǵan tamshylatyp sýǵarý ádisi jáne shpalerli júıe qoldanylýda. Kásiporyn búgingi tańda 1 ga jer teliminde «Zamanaýı tehnologıaly syıymdylyǵy 10 myń tonnaǵa deıin kókónis jáne jemis-jıdek saqtaıtyn qoıma» jobasynyń qurylysyn bastady.