Jeltoqsan aıy týysymen Táýelsizdik kúnine daıyndyq, ol meıramnyń Jańa jyldyq dúrbeleń astynda qalyp qoıatyny týraly dabyl qaǵyp jatamyz. Bas mereke qarsańynda kóptegen uıym, mekemeler, deni jekemenshik kásiporyndar, jańa jylǵa daıyndyqty 1 jeltoqsannan bastap ketip jatady. Kóshelerdi bezendirip, ǵımarattardyń aınalasyna shyrsha tigip, qyzyldy-jasyldy shamdar shaǵyp, Táýelsizdik toıyn tasada qaldyrady.

Ókinishtisi, osyndaı soraqylyqtardan memlekettik mekemeler, memleket qarjysyn ıgerýmen aınalysatyn kásiporyn, uıymdar da ada emes. Qazaqstannyń eń iri oblysy Qaraǵandynyń bas gazeti «Inýdstrıalnaıa Karaganda» gazetine qarata aıtyp otyrmyz muny. Bıyl 80 jyldyǵyn atap ótip jatqan oblystyń gazeti de 1931 jyldan bastap shyǵady. Keńestik jyldary qandaı mazmunda, qandaı sıpatta shyqqanynda sharýamyz joq. Alaıda, Táýelsizdik jyldaryndaǵy ustyny unaıdy deı amaımyz. Olaı deıtinimiz, gazettiń birinshi betinde áli kúnge 1981 jyly alǵan «Eńbek qyzyl tý» ordeni tur batpıyp. Muny Qazaqstan Táýelsizdigin qorlaý demeseńiz de, qurmet kórsetýi deı almaıtynyń anyq.

Áıtpese, ol ordendi kim almady, qaı ujym marapattalmady?! Alysqa barmaı-aq, ol ordendi oblystyq «Ortalyq Qazaqstan» gazeti de ıelengenin aıtýǵa bolady. Alaıda, qazaq tilinde shyǵatyn gazet ujymy orys tilindegi áriptesteri sıaqty ol ordennen aıyrylmaı otyrǵan joq. Gazettiń bas betine otarshyl júıeniń marapatyn emes, Qazaqstannyń Memlekettik Eltańbasynyń sýretin qoıyp júr. Memlekettik aqparattyq tapsyrys oryndaıtyn ózge gazetter de «Inýdstrıalnaıa Karaganda» sıaqty emes, keńestik jyldardyń mundaı «estelikterinen» ada.

Kóbimiz kóshege shyrsha tikti dep kásipkerlerge shúıligemiz. Al, ol kásipkerlerge, jalpy jurtshylyqqa úlgi bolatyn kim? Árıne, memlekettiń ózi jáne onyń saıasatyn túsindirýshi baspasóz organdary. Sondyqtan da, óndiristi ólke, Elbasymyz Nursultan Ábishulynyń eńbek joly bastalǵan óńirdiń bas gazeti Táýelsizdiktiń 25 jyldyq mereıtoıy qorytyndylanar shaqta egemendikke qurmet kórsetip, memleketshildik úlgisin tanytady dep senemiz. Keńes ókimetiniń maqtaý, marapaty búginde mártebe emestigin túsinetin ýaqyt jetti.

Jomart Abdollauly