2001 jyly búkil respýblıkanyń búdjeti 508 mıllıard teńge edi. Al, bıyl tek Ońtústik Qazaqstan oblysynyń búdjeti 550 mıllıard teńgege jýyqtady. Bul bir jaǵynan elimizdiń qanshalyqty damyǵanynyń, ekinshi jaǵynan Elbasy Nursultan Nazarbaevtyń Ońtústik óńirge jasap jatqan qamqorlyǵynyń kórsetkishi. Olaı deıtinim, óńir búdjetiniń 120 mıllıard teńgesi ǵana oblystyń ishki tabystarynan quralǵan. Qalǵan 400 mıllıardtan astam qarjy respýblıka tarapynan transfertter men sýbvensıalar túrinde aýdarylyp otyr.

Ońtústik Qazaqstan oblysyna jumys saparymen kelgen «Nur Otan» partıasy tóraǵasynyń birinshi orynbasary Muhtar Qul-Muhammed osylaı dedi.Partıa tóraǵasynyń birinshi orynbasary Ordabasy aýdanyndaǵy «Adelá» sharýa qojalyǵynyń jylyjaı kesheninde bolyp, arnaıy uıymdastyrylǵan aýyl sharýashylyǵy ónimderiniń kórmesimen tanysty. Jumysshylardyń hal-jaǵdaıyn bilip, olardyń jalaqy mólsherin surady.

– Ońtústik Qazaqstan oblysynda eginshilikke óte qolaıly jaǵdaı bar. Memleket tarapynan da bul salaǵa qomaqty qoldaý kórsetilýde. Árıne, oblys agrarshylarynyń kórsetkishteri jaman emes. Biraq óńirdiń áleýeti budan da joǵary ekenine senimdimin. Aıtalyq, jalpyóńirlik ishki ónimdegi aýyl sharýashylyǵy ónimderiniń úlesi 11-12 paıyzdy quraıdy eken. Mine, osy kórsetkishti 20 paıyzǵa deıin jetkizýge bolar edi, – dedi Muhtar Abraruly.

Aıta keteıik, M.Qul-Muhammed «Ońtústik» ındýstrıaldy aımaǵynda bolyp, «EvroKrıstall» seriktestiginiń jumysymen de tanysty.

A.SAILAÝULY.

«Ońtústik Qazaqstan» gazeti