Búgin Túrkistan qalasyndaǵy mádenıet úıinde veterınarıa salasy boıynsha semınar keńes ótti.

Keńeske ASHM VBjQK tóraǵasynyń orynbasary QR bas veterınarıalyq-sanıtarıalyq dárigeriniń orynbasary T.Qabdýldanov, OQO Aýyl sharýashylyǵy basqarmasynyń veterınarıa salasyndaǵy jumystardy uıymdastyrý bóliminiń basshysy B.Omarov bastaǵan arnaıy top jáne 7 aýdannan mamandar kelip qatysty.

Túrkistan qalasy ákiminiń orynbasary T.Musaev júrgizgen semınardyń maqsaty – búgingi tańdaǵy ózekti máselelerdi  turǵyndarmen birlese otyryp sheshý jáne maldarǵa syrǵa salý, ekpelerdiń ýaqytyly egilýi. Jıyn barysynda qazirgi tańdaǵy qaýipti ári kúrdeli topalań derti (Sıbırskaıa ıazva) jaıynda  aıtyldy. Túlik tańdamaıtyn aýyr indet jaıynda keńinen talqylandy.

Jınalǵandar aldynda baıandama jasaǵan oblystyq veterınarıa ortalyǵynyń mamany B.Dosqojauly arnaıy slaıdpen keńinen túsindirip aýrý oshaqtaryn anyqtaýdyń jáne kúresýdiń tıimdi joldaryn aıtqan maman elimiz boıynsha osy dertten 3 adam kóz jumǵan atap ótti. Sonymen birge, aýrýdyń aldyn alýy, saýyqtyrý jumystarynyń júrgizilýi  basty nazarda bolýy kerek ekenin alǵa tartty. Veterınarıa salasy boıynsha  saraptaý laboratorıasynyń qujat pen ónim sáıkestigi de birinshi kezektegi másele ekendigi aıtyldy. Jıyn sońy suraq-jaýappen ulasyp, kókeıde júrgen máselelerge mamandar tarapynan jan jaqty jaýaptar berildi.

Qala ákiminiń baspasóz qyzmeti