Bıyl Ońtústik Qazaqstan oblysynyń Arys qalasy boıynsha 5239 gektardan astam jerge egilgen baqsha ónimderinen búgingi tańǵa deıin 104178 tonna ónim alyndy.

Syr ana men Arys ózenin tel emgen Arys qalasynyń dıqandary ózderiniń baqsha ónimderin (qarbyz-qaýyn)  oblys ortalyǵy Shymkent qalasy men elimizdiń Astana, Almaty, Aqtaý, Atyraý, Aqtóbe  qalalaryn qamtydy.

Qazirgi tańda baqsha ónimderiniń eksporty Eýro odaq elderine shyǵa bastady. Mysaly, «Aqqala» kooperatıvi qaýyn ónimderin Germanıa, Baltyq elderine, Reseı Federasıasynyń astanasy Máskeý qalasyna, Novosibir, Penza, Samara oblystaryna  jóneltilýde.

Jyldaǵy ónimmen salystyrǵanda ónimdi molynan alǵan arystyq dıqandar ala jazdaı etken eńbekteriniń aqtalǵanyna qýanyshty.

Aıta keteıik, Ońtústik Qazaqstan oblysynyń  Astanadaǵy kúnderi aıasynda oblystyq ónerkásip óndirýshilerdiń kórmesi men aýyl sharýashylyǵy ónimderiniń jármeńkesine Arys aýdanynyń ónimderi de jóneltildi.

Óńirden bas qalaǵa 300 tonnadan astam aýyl sharýashylyǵy ónimderi tıelgen kerýen jolǵa shyqty. Mereıtoıǵa tartý retinde ońtústikqazaqstandyq dıqandar óz ónimderin naryqtaǵy baǵadan 15-20 paıyzǵa arzan saýdalamaq.

Sonymen, jalpy kólemi 304 tonna bolatyn ónimderdiń quramynda 60 tonna et jáne et ónimderi, 126 tonna kókónis, 29 tonna jemis-jıdek, 7 tn sút ónimderi, 5 tn shubat, 25 myń dana jumyrtqa, 40 tn baqsha ónimderi, 7 tn balyq, 7 tn bal, 3 tn ósimdik maıy men 5 tn keptirilgen jemis 15 tn basqa da ónimder bar.