Beısenbide Shymkent qalasy Báıdibek bı dańǵylynyń boıynan aýyl sharýashylyǵy ónimderi tıelgen júk avtokólikteriniń kerýeni Almaty qalasyna qaraı jolǵa shyqty. Óıtkeni, 1 qazanda Almatyda Ońtústik Qazaqstan oblysynyń aýyl sharýashylyǵy kórmesi ótedi.
Jyl saıyn uıymdastyrylatyn osynaý ıgi shara – Ońtústiktiń Almaty jurtshylyǵyna tartatyn syıy. Kúngeıdiń sharýalary kúzgi jıyn-terim ýaqytynda almatylyqtar men astanalyqtarǵa osylaısha syı jasap otyrady. Bul jolǵy ıgi dástúr Qazaqstan Respýblıkasy Táýelsizdiginiń 25 jyldyǵyna arnaldy.
Oblystyq aýyl sharýashylyǵy basqaramasy basshysynyń orynbasary T.Ospanovtyń aıtýynsha, jármeńke Almaty qalasy men Ońtústik Qazaqstan oblysy ákimdiginiń arasynda túzilgen memorandýmǵa sáıkes uıymdastyrylýda. Basqarma ókili óz sózinde jármeńkege sapaly, ekologıalyq jaǵynan tabıǵı taza 320 tonna aýyl sharýashylyǵy ónimi jiberilgenin tilge tıek etti. Ónimderdiń jalpy baǵasy 125,7 mln. teńgeni quraıdy.
Basqarma basshysynyń orynbasary oblystyń agrosalada jetken bıylǵy jetistikterine toqtaldy. Investısıalyq salym 2016 jyldyń 8 aıynda 3,4 mlrd. teńgeden asyp, ótken jyldyń tıisti kezeńimen salystyrǵanda 1,2 mlrd. teńgege artqan. Sýdyń tapshylyǵyna, shegirtkeniń egistikterdi búldirip ketkenine qaramastan, bıyl ońtústikqazaqstandyq dıqandar mol ónimge qol jetkizdi. Sharýalardyń qajyrly eńbegi, memlekettiń qoldaýy jáne agrotehnıkalyq talaptar saqtalýynyń arqasynda osyndaı joǵary kórsetkish oryn alyp otyr.
Sonymen, Almaty qalasyna bizdiń oblystan 60 tonna et, 106 tonna kókónis, 29 tonna jemis-jıdek, 7 tonna sút ónimderi, 5 tonna shubat, 25 myń dana jumyrtqa, 45 tonna baqsha ónimderi, 5 tonna balyq, 5 tonna keptirilgen jemis jáne 15 tonna basqa da ónimder jóneltildi. Atalǵan aýyl sharýashylyǵy taýarlary qala turǵyndaryna bazardaǵy naryq baǵasynan 10-15 paıyz arzan baǵada satylady.
Ánýar JUMASHBAEV, «Ońtústik Qazaqstan» gazeti
