Buǵan deıin ınternette ózin Dáýlet Turlyhanov dep tanystyrǵan adamnyń Erbolatqa «Ninety One» toby úshin sógis aıtqan telefon dıalogy taralǵan edi.  Buǵan qatysty «Qamshy» tilshisi ult maqtanyshy Dáýlet Turlyhanovqa mán-jaıdyń anyq-qanyǵyn bilý maqsatynda qońyraý shalyp, máseleniń anyǵyn bilgen edi. Qamshyger qońyraýyna Dáýlet Turlyhanov: «Bul bireýdiń jasaǵan ıntrıgasy. Aýdıojazbada ózin Dáýlet Turlyhanov dep tanystyrǵan daýystyń ıesi men emespin. Erbolat Bedelhanmen bul másele boıynsha sóılesken joqpyn. Kim ne úshin, qandaı maqsatta meniń atymdy paıdalanyp otyr túsinbedim. Shyn aıtsam, «Ninety one» degen top baryn da bilmeppin. Jańa ǵana Mádenıet jáne sport mınıstri Arystanbek Muhamedıuly oryn alǵan jaıtty joqqa shyǵarýymyz qajet dep habarlasqan bolatyn. Men taǵy da qaıtalap aıtaıyn, bul bireýdiń ıntrıgasy, qatty tańyrqap otyrmyn», - dep jaýap bergen bolatyn.

Keıinnen Dáýlet Turlyhanov Instagram jelisindegi resmı paraqshasynda da bul aýdıo jazbadaǵy daýystyń ózine tıesili emes ekenin aıtty. "Qurmetti oqyrmandar! Men Ninety One tobyna eshqandaı da sógis aıtqanym joq, top prodúseri Erbolat Bedelhan ekeýmizdiń aramyzda eshqandaı da áńgime bolǵan emes", - dep málimdedi Dáýlet Turlyhanov.

Tengrinews.kz habarlaýynsha, Ninety One ókilderi de Jelide taraǵan aýdıojazbaǵa qatysty pikir bildirgen: "Qazir toptyń prodúseriniń aınalsynda bolyp jatqan oqıǵanyń barlyǵy - qastyq áreketter. Ony kimniń jasap jatqanyn biz ázirshe bilmeımiz. Eń qyzyǵy Erbolat Bedelhannyń daýsyn sheber salypty, tipti bizdiń ózimiz óz qulaǵymyzǵa sene almadyq. Sońǵy ýaqytta bizdiń aınalamyzda shý shyǵyp jatqany eshkimge de jasyryn emes. Biz barlyǵyna da túsinip qaraımyz", - dep aqtalǵan toptyń prodúserligimen aınalysatyn Juz Media kompanıasynyń ókilderi.

Sondaı-aq, olar top taraıdy degen qaýesetti de joqqa shyǵarǵan. "Barlyq jetistikke eńbekpen, qajyr-qaıratymyzben jettik. Qazir de qajyr-qaıratymyz bar. Úndemesek, bul sahnadan ketýimizdi bildirmeıdi. Biz jumys barysyndamyz, eńbektenip jatyrmyz, sebebi maqsatqa jetýimiz kerek. Sondyqtan resmı túrde aıtamyz, Niney One tobyn taratý Erbolat Bedelhannyń josparynda joq. Biz bir otbasymyz. Birge bastadyq, shoý-bıznestegi jolymyzdy birge jalǵastyramyz", - dep pikir bildiripti Niney One ókilderi.

Aıta keteıik, osyǵan deıin Internette jarıalanǵan aýdıojazbada ózin Dáýlet Turlyhanov dep tanystyrǵan adam Erbolat Bedelhanǵa Ninety One toby úshin sógis aıtady. "Nemene shýlatyp júrsińder, tepse temir úzetin jigitter ǵoı balalar, (...) sheteldikterge uqsaıdy ǵoı túrleri, shetelge ketip qalsyn", - deıdi er adam. Buǵan toptyń prodúseri delingen adam maquldap, keliskendeı bolady.