Qytaı halyq respýblıkasy jer resýrstary mınıstriniń orynbasary Qazaqstan men Qytaıdyń birikken geologıalyq kartasyn jasaý kerektigin málimdedi, - dep habarlaıdy Qamshy.kz PM.kz – ke silteme jasap.
Sondaı-aq, Qytaı taraby qazaqstandyq stýdentterge bilim stıpendıalaryn bólýge múddelilik tanytyp otyr.
Bul týraly keshe Beıjińde ótken Qazaq-Qytaı áriptestigi jónindegi komıtettiń geologıa jáne jer qyrtysyn paıdalaný salasyndaǵy áriptestik jónindegi kishi komıtettiń 8-otyrysynyń ashylýynda belgili boldy.
Jıynǵa qazaq delegasıasyn Qazaqstannyń Investısıalar jáne damý mınıstrligi Geologıa jáne jer qyrtysyn paıdalaný komıtetiniń tóraǵasy Bazarbaı Nurabaev pen Q. Sátbaev atyndaǵy geologıa ǵylymı ınstıtýtynyń dırektory Murat Ómirserikov bastap barǵan. Bas qosýǵa Qytaı elinen jer jáne tabıǵı resýrstar mınıstrliginiń ókilderi, QHR Syrtqy ister mınıstrligi Azıa jáne Eýropa departamentiniń birinshi hatshysy, QHR Geologıalyq barlaý partıalyq tobynyń músheleri, Geologıa Akademıasy men geologıalyq vedomstvo ókilderi qatysypty.
Komıtet otyrysynyń ashylýynda sóz sóılegen QHR Jer jáne tabıǵı resýrstar mınıstriniń orynbasary Sao Veısın Qazaqstan delegasıasyn el Táýelsizdiginiń 25 jyldyǵymen quttyqtap, qazaq halqynyń gúldenýine tilektestik bildirgen. Sondaı-aq, vıse-mınıstr eki el geologıalyq qyzmetteriniń áriptestigi men zerttelip jatqan óńirlerdiń birińǵaı geologıalyq kartasyn jasaý maqsatynda geologıalyq aqparattarmen almasýdy kúsheıtýdiń mańyzyn basa aıtypty.
Otyrystyń kún tártibinde sonymen qatar, eki el arasyndaǵy áriptestik jónindegi komıtet jumysy jónindegi aqparattandyrý, eki el shekarasyndaǵy aımaqtardyń birińǵaı kartasyn jasaý jobasyn taldaý máseleleri de qaralǵan. Jıynda eki eldiń geologıalyq barlaý kompanıalary men kásiporyndarynyń halyqaralyq kongrester men ken-metallýrgıalyq sala kórmelerine qatysý jaıy da pysyqtalǵan.
Qytaı taraby qazaqstandyq áriptesterine 2017 jyldyń birinshi jartysynda geolog mamandaryn oqytýǵa daıyn ekendigin, sondaı-aq, Beıjiń ýnıversıtetterinde bilim alyp jatqan qazaqstandyq úzdik stýdentterge QHR Úkimeti atynan stıpendıa taǵaıyndaıtyndaryn aıtqan.
Otyrys qorytyndysy boıynsha Qazaqstannyń Investısıalar jáne damý mınıstrligi Geologıa jáne jer qyrtysyn paıdalaný komıteti men QHR Geologıalyq qyzmeti arasyndaǵy áriptestik týraly Memorandým qabyldaý jaıy qarastyrylýda.
Jomart Abdollauly
