Sáýir aıynda «Ańyz adam» jýrnalynyń №8 sanynda shyqqan Gıtlerge qatysty materıal ózimiz túgili kórshi Reseıdi de «shý etkizdi». Reseıden elimizge edel-jedel nota jetip, BAQ salasy gýildep ketip edi, atap aıtsaq REGNUM «Novostı» aqparattyq agenttiginiń aty belgisiz avtory «Ańyz adam» jýrnalyn qaralap, «bul jýrnal Gıtlerdiń 125 jyldyǵynyń qurmetine basyldy, basylym fashısik ıdeologıany aqtaýǵa arnalǵan» dep kiná taqqan bolatyn. Sodan soń «ekinshi dúnıe júzilik soǵystyń eń basty qylmyskeriniń» 125 jyldyǵy týraly múlde oılanbaǵan, Adolf Gıtler týrly jazý arqyly qoǵamdyq qaýipsizdikti tý etken Jarylqap Qalybaıdy ózimizdiń quzyrly organdar sotqa súıreı jóneldi. Máseleni «maı shammen qaraǵan» olar, qazaq tildi basylymdardy órkendetýde menedjerlik iskerligimen dara turǵan jýrnalıs hám «Ańyz adam», «Juldyzdar otbasy» jýrnaldarynyń bas redaktory Jarylqap Qalybaıǵa «basylymdaǵy tehnıkalyq qatelikteri» úshin ákimshilik sotta 200 AEK aıyppul salǵan bolatyn.
Bul arada aýǵan soǵysynyń ardagerleri jıylyp, «28 Panfılovshylar» saıabaǵynda narazylyq retinde jýrnaldy oqymastan órtegeni óz aldyna, jasy 83 pen 90-nyń arasyndaǵy 10 ardager basylymnyń «buqaralyq nasıhatyna» alańdap, «taptalǵan» moraldyq quqyqtarynyń ótemi retinde ár qaısysy 5 mıllıon teńgeden 50 mıllıon talap etip, notarıýs arqyly Jarylqap Qalybaıdyń ústinen shaǵym túsirip te úlgergen edi.
Sottyń alǵashqy otyrysynda-aq qarttar úıinde turatyn ardagerlerdiń jýrnaldy múlde oqymaǵany, tipti jýrnaldy tanymaıtyny belgili boldy. Erteń bolatyn sot otyrysy aldynda «Ańyz adamnyń» bas redaktory Jarylqap Qalybaıǵa qońyraý shalyp, «daıyndyǵyn» suraǵan edik:
«Ózderińiz biletindeı, aldyńǵy joly sottyń birinshi otyrysy ótken bolatyn. Onda maǵan aıypty emes ekenińiz týraly dálel jınap kelińiz dep shyǵaryp saldy. Men jýrnalda barlyq dálel jazylǵany týraly aıttym. Kerek etse, búkil qazaq ıntellıgensıasynyń daýǵa qalǵan materıalǵa qatysty pikiri de bar, olar «Ańyz adam» jýrnalynyń daýǵa qalǵan 8-sanyn útir-núktesine deıin qaldyrmaı oqydyq, eshqandaı da Gıtlerdi dáripteý nemese fashızmdy nasıhattaý joq dep pikirlerin bildirdi. Al jýrnaldy múlde oqymaǵan, tipti qazaqsha saýaty joq on ardager meni notarıýs arqyly «sotqa beripti». Men búkil qazaq ıntellıgensıasyna emes, jýrnalmen tanys emes on ardagerge senip, aqty qara dep otyrǵan sotqa tań qalamyn! Olar erteń meni qaralaýy múmkin, men apelásıa berýge májbúr bolam, olar meni solaı tıtyqtatqysy keletin shyǵar. Alaıda Gıtlerdi jeńgen qazaq, Gıtlerdiń atynan jeńile me», - deıdi «ańyz» jýrnal «Ańyz adamnyń» bas redaktory.
Qazaq basylymynyń qatary bireýge sırep qala ma dep, ishten tynǵan qalyń oqyrmannyń kúpti kóńili erteńgi sottyń ádildiginen úmit kútedi.
Nurtaı Nurǵalı
Abai.kz
