Ońtústik Qazaqstan oblysynyń dıqandary elimiz egemendik alǵan shırek ǵasyrda dándi daqyl jınaý boıynsha úzdik kórsetkishke qol jetkizip, rekord jasady. Oblystyq aýyl sharýashylyǵy basqarmasy mamandarynyń málimetinshe, bıyl óńir dıqandary 676 myń tonna (ótken jylmen salystyrǵanda 95 myń tonnaǵa kóp) ónim jınap, buryn-sońdy bolmaǵan nátıjege qol jetkizip otyr. Ortasha túsimdilikke shaqqanda, gektaryna 26 sentner dándi daqyldan túsken.
Sonymen qatar sharýalar bıylǵy maýsymda ózge daqyl túrlerinen de mol ónim jınaı bildi. Máselen, 963 myń tonnadan astam kókónis túrleri, 1 mıllıon 413 myń tonna baqsha ónimderi, 277 myń tonna kartop jınalyp alyndy. Sondaı-aq, 126 myń tonna jemis-jıdek, 63 myń tonna júzim terildi. Bul kórsetkishterdiń barlyǵy da ótken jyldyń kórsetkishterinen anaǵurlym joǵary.
Sońǵy úsh jylda jerdi jańa ádispen ıgerý jumystary júrgizilýde. Osy jyly 86 myń gektar jerge tereń qopsytý tehnologıasy engizildi. Buǵan deıin tájirıbe júzinde maqtadan gektaryna ortasha eseppen 26-27 sentnerden ónim alynsa, tereń qopsytý tehnologıasyn engizgen sharýashylyqtar gektaryna 40-45 sentnerden ónim jınady. Atalǵan tehnologıanyń qatty topyraq ylǵaldylyǵyn saqtaýdaǵy tıimdiligin eskere otyryp, bul tehnologıany basqa da daqyldar men tálimi jerlerge qoldaný usynylýda.
Aıta keteıik, bıyl aýyl sharýashylyǵy daqyldaryn egý kólemi ótken jylmen salystyrǵanda 12,8 myń gektarǵa artyp, 788,6 myń gektarǵa jetti.
Ortasha eseppen respýblıka boıynsha óndirilgen maqtanyń 100, júzimniń 65, baqshanyń 66, maqsarynyń 40, jemis-jıdektiń 31, kókónistiń 24 paıyzy Ońtústik Qazaqstan oblysynyń enshisinde. Bul Ońtústik Qazaqstan oblysyn respýblıka halqyn jergilikti azyq-túlik ónimderimen qamtamasyz etetin negizgi ortalyqqa aınaldyrý áleýetiniń óte joǵary ekendigin baıqatady.
OQO ákiminiń baspasóz qyzmeti.
