Japonıada Osaka qalasyna jaqyn Tsý degen jerde 20-27 tamyz aralyǵynda ótken IESO– 2016 Jer týraly halyqaralyq ǵylymı olımpıadasynda jas geologtardyń qazaqstandyq komandasy júldeli oryndarǵa ıe boldy.    

Olımpıadaǵa Qazaqstannyń ókilderi retinde 4 qatysýshy bardy. Astana qalasy №4 gımnazıa-mektebiniń 10-synyp oqýshysy Jaǵyparova Álıa jeke synaqta qola medalin jeńip aldy, sondaı-aq halyqaralyq komanda quramynda Jer týraly ǵylymdar jónindegi jobada (Earth Science Project)  birinshi orynǵa ıe boldy.  

Nazarbaev zıatkerlik mektebiniń 10-synyp oqýshysy Baımýrzına Ádıa ITFI (Halyqaralyq komandalyq dalalyq zertteý) komandalyq saıysta birinshi orynǵa ıe boldy.

Nazarbaev zıatkerlik mektebiniń 10-synyp oqýshylary Aımýhambetova Ázıza men Tólegenova Arýjan Arýjan da barlyq saıystarǵa belsendi qatysyp, elimizdi laıyqty deńgeıde tanyta aldy.  

«Jas geolog» korporatıvtik qorynyń dırektory Janat Ismaılovanyń aıtýynsha, qazaqstandyq komandanyń ulttyq kostúmmen óner kórsetýi Olımpıadanyń jabylý saltanatyna  arnalǵan gala-konsertke erekshe kórik berdi. Sonymen qatar, olımpıada aıasynda qatysýshylar men qonaqtarǵa EKSPO 2017 kórmesine shaqyrý retinde bizdiń qonaqjaı elimiz týraly beınerolık kórsetildi.  

Jer týraly halyqaralyq ǵylymı olımpıada (IESO – International Earth Science Olympiad) – geologıa, meteorologıa, muhıttaný jáne astronomıa pánderi boıynsha orta mektep oqýshylary arasynda ótkiziletin jyl saıynǵy saıys. Olımpıada mektepterde Jer týraly ǵylymdardy oqytýdy jetildirýge sebep bolady. Eń bastysy, IESO olımpıadasy ár túrli elderdiń jas ǵalymdary arasyndaǵy dostyq qarym-qatynasty damytady, sondaı-aq Jer týraly ǵylymdar boıynsha ıdeıalarmen jáne materıaldarmen almasý salasyndaǵy halyqaralyq yntymaqtastyqty  damytýǵa yqpal etedi. 

Barlyq qatysýshylar Astana qalasyndaǵy «Jas geolog» úıirmesiniń músheleri, sondaı-aq 2016 jylǵy Jas geologtardyń IV  Qazaqstandyq ashyq dala olımpıadasyna qatysýshylar bolyp tabylady. 2016 jyly halyqaralyq olımpıadaǵa álemniń 33 elinen 132 komanda qatysty.