2016 jyldyń 14 qyrkúıegi kúni QR Investısıalar jáne damý mınıstri J.Qasymbek QHR Gonkong qalasynyń qarjy máseleleri jónindegi hatshysy Djon Sang bastaǵan delegasıamen kezdesti. Gonkongtan kelgen delegasıanyń negizgi maqsaty – Qazaqstannyń ınvestısıalyq klımatymen jáne ınvestısıa salýǵa bolatyn jobalarmen tanysý. 

Ekijaqty kezdesý barysynda Gonkongtyq tarap Qazaqstanǵa kelgendegi negizgi jumystaryn aıtyp, aldaǵy josparlarymen tanystyrdy. Qazaqstandyq tarap elimizde ınvestısıalyq klımattyń jaqsarǵany týraly, ınvestorlarǵa qolaıly jaǵdaılar jasalǵany jóninde jáne ınvestorlardyń quqyǵyn qorǵaýda qatań talaptar ázirlengenin alǵa tartty. Sonymen qatar, ınvestısıalyq jobalardy júzege asyrý múmkindikteri talqylandy.

Aıta ketý kerek, Qazaqstan Respýblıkasyna Gonkongtan kelgen tikeleı sheteldik ınvestısıa 2005 jyldan 2015 jylǵa deıingi aralyqta 98,3 mln. AQSH dollaryn quraǵan. Al, Qazaqstannan Gonkongka baǵyttalǵan tikeleı ınvestısıa dál osy jyldary 107,1 mln. AQSH dollaryna teń bolǵan. 

Kezdesýge Qazaqstan tarapynan Gonkong qalasyndaǵy Qazaqstan Respýblıkasynyń Bas konsýly Ánýarbek Arynǵazınov, QR IDM Azamattyq avıasıa komıtetiniń tóraǵasy Beken Seıdahmetov, QR IDM Syrtqy ekonomıkalyq yntymaqtastyq departamentiniń dırektory Gúldana Sadyqova, QR IDM Investısıa komıteti tóraǵasynyń orynbasary Qaırat Qarmanov, QR IDM Indýstrıa jáne týrızm departamenti tóraǵasynyń orynbasary Temirǵalı Tyrmyshev qatysty. Al, Gonkong tarapynan «Bir beldeý, bir jol» strategıasyn júzege asyrý máseleleri jónindegi ýákil Ivonna Choı, Gonkong halyqaralyq arbıtrajdy ortalyq basqarma tóraǵasy Tereza Chen sıaqty onshaqty bıznes ókilder qatysty.