Alekseı Nı aýyr atletıkadan Qazaqstan quramasynyń bas bapkeri qyzmetinen ketti, - dep habarlaıdy Vesti.kz Federasıanyń baspasóz qyzmetine silteme jasap.

Alaıda, Alekseı Nıdiń otstavkaǵa ne sebepti ketkeni aıtylmaǵan.

Bapker bul qyzmetti 26 jyldan beri atqaryp keledi. Ol bapker bop turǵanda alty Olımpıadaǵa jáne 15 álem chempıonatyna qatysty, sondaı-aq Azıa oıyndary men Azıa chempıonattary bar.

«Munyń barlyǵy ne sebepti bolyp jatqanyn, kimniń jasap otyrǵanyn men bilmeımin. Men saıasatker emespin, balshy da emespin. Men bapkermin, eshteńege qaramastan, sportshylardy daıyndaımyn. Biz óz shyndyǵymyzdy dáleldeýge tyrysamyz», - degen edi Alekseı Nı shákirtteri túsken dopıng daýy jaıly.

Aıta ketsek, aýyr atletıkadan Qazaqstan atynan 2008 jáne 2012 jyldary olımpıadaǵa qatysyp, chempıon atanǵandar túgeldeı dopıng daýyna iligip, ataqtaryn qaıtardy.