Ýkraınadan qýylǵan prezıdent Ianýkovıch Ýkraınada maıdan kóterilisi bolyp jatqanda ásker kirgizbegenine ókinedi.
BBC-diń habarlaýynsha, Ianýkovıch baspasóz konferensıasynda Ýkraınaǵa áskerı jaǵdaı engizýge qol qoımaǵanyna ókinetinin aıtqan.
«Men shynymen de qatelik jasadym, áýlıe emespin ǵoı, Ýkraınaǵa áskerı jaǵdaı engizýge, ásker kirgizý buıryǵyna qol qoıýǵa ózime kúsh bere almaǵanym basty qateligim boldy. Bul radıkaldardy toqtatýdyń jalǵyz sharasy bolǵan bolar edi. Men qantógiske barmadym», - dedi Dondaǵy Rostovta ótken baspasóz-konferensıasynda Ianýkovıch.
Ol sondaı-aq, eger sol ýaqytqa qaıta oralar múmkindik bolsa báribir de ol qujatqa qol qoıa almaıtynyn, Ýkraına qatty bólingenin, óıtken jaǵdaıda azamattyq soǵys týylatynyn aıtqan.
Ýkraınadan qashyp, Reseıge bas saýǵalaǵan Ianýkovıch Ýkraınanyń terıtorıalyq tutastyǵyn qoldaıtynyn, ári tutastyqty saqtap qalý úshin Donbassqa tolyq quqyly avtonomıa mártebesin berý jáne Amnıstıa jarıalaý kerek ekenin aıtty. Ol bul turǵyda Ýkraın bıligin Donbasspen kelisimge kelýge qulyqsyzdyǵy úshin aıyptady.
«Qyrymnyń Ýkraınadan aıyrylyp ketkeni jaqsy boldy ma, joq, men jaman boldy dep sanaımyn. Qyrym halqynyń daýysy maıdandaǵy provokasıanyń kesiri» dedi Ianýkovıch.
Aıta keter bolsaq, Rostov oblystyq sotqa Kıevtiń tergeýine vıdeo konferensıa arqyly jaýap berý úshin burynǵy prezıdent kelýge tıisti boldy. Ianýkovıch sotqa keldi ári vıdeo baılanysqa da shyqty. Degenmen Kıevtegi sotta aıyptaýshylar kelmeı qalýyna baılanysty tergeý 28 qarashaǵa keıinge qaldyrylǵan.
Ianýkovıch sotta maıdandaǵy belsendilerdi atty degen qylmyspen aıyptalǵan burynǵy 5 «Berkýt» arnaýly jasaǵyna qarsy kýálik etedi.
Ianýkovıch baspasóz-konferensıasynda maıdandaǵy belsendilerdi atqan snaıperlerdiń belsendiler baqylaýyndaǵy ǵımarattan oq atqanyn, óziniń eshqandaı da qarýly kúsh qoldanýǵa buıryq bermegenin atap ótti.
Ýkraın bıligi onyń 2013 qarashasy - 2014 aqpany aralyǵynda maıdanǵa ereýilge shyqqandarǵa beıbit shara qoldanǵanyna kúmán keltiredi.
Ýkraınanyń bas prokýratýrasy qazir Ianýkovıch kúdikti retinde qaralǵan 8 qylmystyq isti tekserip jatyr. Sondaı-aq jemqorlyq boıynsha aıyptalǵan.
Baspasóz-konferensıasynda burynǵy ýkraın prezıdenti jemqorlyq aıybyn joqqa shyǵardy. Onyń sózinshe ol Ýkraınadan tek «qol júgimen» ketken. Qazirge deıin Ianýkovıchtiń sheteldik esepshottary anyqtalmaǵan.
Aýdarǵan Qarabýra Qultaı
