Osydan 2 juma buryn ǵana, 10 qarashada Astana qalasynda máslıhat sheshimimen birqatar kóshelerdiń ataýy aýysatyny, jańa kóshelerge at berilgeni belgili bolǵan. Máslıhat depýtattary Elordanyń negizgi dańǵyldarynyń biri Orynbor kóshesin «Máńgilik el» dep ataýdy uıǵarǵan edi. Al, basty dańǵyldan yǵystyrylǵan «Orynbor» esimin qalanyń batys shetindegi, ózi eleýsiz E10 kóshesine qoıa salǵan.

Osy juma kúni Astanada Orynbor kóshesi ataýy jazylǵan arnaıy taqtaıshalar alyp tastalyp, onyń ornyna jańa «Máńgilik el» kóshesi dep jazylǵan taqtaıshalardy ornatty. Áýel basta, «Elorda kósheleriniń aty ózgeredi» degende, qala ákimdigi halyqqa qyzmet kórsetý ortalyqtary zańdy jáne jeke tulǵalar úshin úı qujattaryn aýystyratyndyǵyn, úıdiń tehnıkalyq tólqujatyna ózgeris engizý tegin bolatyndyǵyn túsindirgen. Alaıda, elektrondy úkimettiń konsýltanttary qujattardy aýystyrý 530 teńge turatynyn habarlaǵan.  

Kóshe atyn aýystyrǵysh Astana máslıhaty Eńbekshilder dep atalyp kelgen kóshege 36-shy kóshemen biriktirip, Alash kósemi Álıhan Bókeıhanovtyń esimin qoıdy. Al, buǵan deıin «Saryarqa» aýdanyndaǵy Bókeıhanov kóshesi endigi ýaqytta Ázerbaıjan Mámbetov kóshesi de atalmaq.