Ońtústiktegi kórshimiz Ózbekstan respýblıkasynda sońǵy ret 2015 jyly 29 naýryz kúni prezıdent saılaýy ótken edi. Qartań tartqanyna qaramastan Islam Karımov taǵy da halyqtyń daýysyn «jınap» kelesi prezıdenttigin qorǵap qalǵan bolatyn.

Keshe, 4 jeltoqsan Ózbekstan azamattary sońǵy 27 jyl avtorıtarlyq tásilmen el basqarǵan, qyrkúıektiń basynda 78 jasynda qaıtys bolǵan Islam Karımovten soń bes jyl merzimge prezıdent bolatyn kelesi adamnyń bılikke kelýine daýys berdi.

Ózbekstan Ortalyq saılaý komısıasynyń málimetinshe, daýys berýge qatysqandar elektorattyń 88 paıyzyn qurady. Ózbekstanda el prezıdenti laýazymyna saılaý aıaqtaldy. Daýys berý jeksenbi, 4 jeltoqsan kúni saǵat 06.00-de bastalyp, 20.00-de aıaqtaldy. Tús aýa Ortalyq saılaý komısıasy saılaýdy ótti dep tanydy, sebebi kelýshilerdiń sany qajetti 33 paıyzdan asyp jyǵyldy. OSK-nyń málimetinshe, saılaýda 17 mln. 941 myń 955 adam daýys berdi, bul elektorattyń 87,83 paıyzy. Bul týraly 4 jeltoqsan kúni  qorytyndy brıfıńte OSK tóraǵasy  Mırza-Ýlýgbek Abdýsalomov aıtty.

Daýys berý el ishindegi - 9383  jáne shet elderdegi 44 saılaý ýchaskesinde ótti. OSK tóraǵasy daýys berýdiń nátıjesi boıynsha bolashaq prezıdent týraly aldyn ala málimetterdi atamaı, alǵashqy nátıjeler 5 jeltoqsan kúni tústen keıin aıtylatynyn jetkizdi. Buǵan deıin habarlanǵandaı, saılaýǵa tórt úmitker qatysýda - prezıdent mindetin atqarýshy Shavkat Mırzıeev Ózbekstannyń lıberaldyq-demokratıalyq partıasy atynan túsýde,  Hatamjon Ketmonov Halyq-demokratıalyq partıasynan, Narıman Omarov sosıal-demokrattardan jáne parlamenttiń tómengi palatasynyń vıse-spıkeri Sarvar Otamýratov demokratıalyq partıadan saılaýǵa qatysty.  

Aıta keter bolsaq, Ózbek bıligi saılaý nátıjesi týraly aqparatty meılinshe jabyq ustady.