«WikiLeaks» saıty Túrkıa prezıdentiniń kúıeý balasynyń munaı ımporttaý men eksporttaýǵa qatysty DAISH lańkestik tobymen baılanysyn áshkereledi. Bul týraly «Qamshy» portaly habarlaıdy.
«WikiLeaks» áshkerelegen qujattar Túrkıa prezıdenti Rejep Taıyp Erdoǵannyń kúıeý balasy ári osy eldiń Munaı mınıstri Berat Albaıraq «Power Trans» munaı kompanıasymen yntymaqtastyqta bolǵanyn kórsetedi. Túrkıa úkimeti DAISH lańkestik tobynan munaı ımporttady dep aıyptalyp otyrǵan «Power Trans" kompanıasynyń munaı ımporty men eksportyna kedergi jasamaı otyr.
Kóptegen halyqaralyq qupıa qujattarmen jasyryn baılanys, astyrtyn áreketterdi jaryqqa shyǵaryp, kún tártibinen túspeı kele jatqan Wikileaks Túrkıa bıligine «bas aýrý» bolatyn qujattardy áshkereledi.
2000 jyldan bıylǵy jyldyń 23 qyrkúıegine deıingi 16 jyldyq ýaqytta 58 myńǵa jaqyn elektrondy poshta jazbalaryn zerdelegen Wikileaks Albaıraqtyń DAISH-pen saýda jasasqan 2000 Powertrans kompanıasymen baılanysyn ortaǵa shyǵardy. Naqtyraq aıtqanda, 2000 jyldyń sáýirinen, 2016 jyldyń 23 qyrkúıegine deıingi ýaqytta 57.934 elektrondy hat Albaıraqtyń jeke poshtasynan joldanǵan. Ondaǵy keıbir hattar Albaıraqtyń advokattary arqyly «Powertrans» kompanıasymen baılanysyn aıǵaqtaıdy.
Jarıalanǵan málimette Túrkıa bıligin qolyna ustap otyrǵan Ádilet jáne Damý partıasynyń 2013 jyly Ystambuldyń ortalyq alańdarynyń biri Gezı parkinde bolǵan jaǵdaıǵa baılanysty áleýmettik jelini baqylaý maqsatynda «trolder ordasyn» qoldanǵany týraly hám basqa da qıturqy derek bar.
Aıta ketsek, osy «WikiLeaks» jarıalaǵan málimetter AQSH-taǵy prezıdent saılaýy kezinde Hılları Klıntonnyń bási tómendeýine yqpal etken edi. Onda, WikiLeaks saıty AQSH demokratıalyq partıasy ulttyq komıtetiniń elektrondyq poshta arqyly joldanǵan 20 myńǵa jýyq hatyn jarıalady. Onyń ishinde Hılları Klıntonnyń prezıdenttik naýqan bastalmaı turǵanda qarjygerler men AQSH-taǵy isker toptar ókilderi aldynda aqysy tólengen sózderinen úzindiler keltirilgen birneshe myń elektrondy hattary da bar.
WikiLeaks – halyqaralyq beıkomersıalyq uıym, anonımdik derekkózderinen alynǵan nemese baıqaýsyzda tarap ketken qupıa aqparattardy jarıalaıdy. Saıt 2006 jyly jeltoqsanda qurylǵan. Ýıkılıks saıty 2009 jyly AQSH memlekettik departamenti men qorǵanys mınıstrliginiń myńdaǵan qupıa qujattaryn jarıalaǵan edi. Avstralıadaǵy «Sıdneı beıbitshilik qory» osy eldiń azamaty, «Ýıkılıks» ınternet saıtynyń negizin qalaǵan Jýlıan Assanjdy «quqyq qorǵaý salasyndaǵy qyzmeti» úshin «Sıdneı beıbitshilik syılyǵymen» marapattaǵan.
