Astana-Býrabaı tas jolynda qaıtys bolǵan Qumarbek Jáketaı meıirimdi, kóńildi adam bolǵan. Onyń áreketi kóp adamnyń júreginde óshpes iz qaldyrdy dep habarlaıdy tengrinews.kz
Uly Nurbol ákesimen sońǵy ret telefonmen sóılesip úlgergen eken. Qumarbek Jáketaı apatqa 2 mınýt qalǵanda balasyna telefon shalǵan. Ol jolda kele jatqan ulyn ýaıymdap, qal jaǵdaıyn bileıin dep habarlasqan.
Balasy kólik apatyn kórgenin, alaıda olardyń arasynda ákesi bar dep múlde oılamaǵanyn aıtady.
«Demeý beretin týǵan-týys bar. Kómekke muqtajbyz dep aıta almaımyn. Ózim Astanada jumys isteımin. Tek bir ǵana ótinishim bar. Ákemniń erligi eleýsiz qalmasa eken. Bul taǵy bir ólimmen aıaqtalmaýy úshin kerek» deıdi uly Nurbol.
Qumarbek Jáketaevtyń áıeli jubaıyn óte meıirimdi, kómekke zárý adamdarǵa únemi qol ushyn beretin adam edi dep eske aldy.
Qumarbek Jáketaı endigi jyldyń 3 aqpanynda 51 jasqa tolýy kerek edi. Áıeli ekeýi 1992 jyly Mońǵolıadan kóship kelgen. Sodan beri Jańa jol aýylynda turady. 6 jeltoqsanda Qumarbek Jáketaıdy jerledi. Qutqarylǵan Nissan Cefiro kóliginiń júrgizýshisi Erlan Ospanov ta keldi. Qumarbek Jáketaı ómirin saqtap qalǵan adamdardyń arasynda ol da bar.
4 jeltoqsanda Astana-Býrabaı tas jolynda iri kólik apaty bolǵanyn eske salamyz. Birneshe kólik soǵysyp, 4 adam qaıtys boldy.
Saǵat 14.10 shamasynda Atameken aýylynyń janynda Býrabaıdan Astanaǵa kele jatqan avtobýs Nissan Cefiro kóligimen soqtyǵysqan. Avtobýstyń ishinde 49 adam boldy. Kólikte otyǵan úsh adam sol jerde til tartpastan kóz jumdy. VAZ-2106 kóliginiń júrgizýshisi de qaıtys boldy. Er adam mashınasynan ne bolǵanyn bilý úshin shyqqan. Biraq, avtobýs tıip ketip, ol da oqıǵa ornynda qaıtys boldy. Kólikti Kókshetaýdyń turǵyny tizgindegen. Aqmola oblysynyń İİD málimetinshe ol Reseıde esepte turǵan eken.
Áleýmettik jelilerde apat bolǵan jerde úsh jasar bala bolǵany týraly aqparat tarady.
Kýágerlerdiń aıtýynsha kólikke avtobýs ushyp túspes búryn ony maıysqan kólikten shyǵaryp alǵan. Bala Makınsk qalasyndaǵy jaqyn aýrýhanaǵa jetkizildi. Tiri qalǵan balanyń týystary aýrýhanaǵa jetti.
