Qazaqstanda jarty tonnadan astam qan ótkizgen rekordtyq kórsetkishke ıe donor bar. Cegiz myńdyq shyńdardy 14 márte baǵyndyrǵan eń jas álpınıs te bizdiń otandasymyz. Al keýdesine 10 keliden artyq metal buıymdardy jabystyra alatyn magnıt-áıel Oral qalasynda turady. Osyndaı erekshe tulǵalar men úzdik kórsetkishter bir jerge jınaqtaldy. Almatyda ár salanyń úzdikteri tirkelgen rekordtar kitabynyń jańa basylymy jaryqqa shyqty.
Muqaǵalı aqynnyń "Men donormyn" óleńi ómirlik uranyna aınalǵan Aleksandr Skakovskıı osy ýaqytqa deıin jarty tonnadan artyq qan ótkizgen. Qazaqstandaǵy nómiri birinshi donor 1051 ret qan tapsyrǵanyn aıtady. 45 jyl boıy talaı janǵa kómegi tıgen 70 jastaǵy qarıaǵa kóptiń qoshemeti de erekshe.
ALEKSANDR SKAKOVSKII, Donor:
- Men 1971 jyldan beri qan tapsyramyn. Eń alǵash bosanaıyn dep jatqan kelinshekke qan kerek bolyp, meniń qanym sáıkes kelgen. Meniń qanymdy quıyp náreste men anasyn aman alyp qaldy.
Rekordtyq kórsetkishi bar otandastarymyz qatarynda sportshylar da, álpınıser de bar. Tipti, álemde teńdesi joq dárigerler otbasy da rekordtar kitabyna engen. Almatylyq Dýdaevtar otbasynda 28 tis dárigeri bar eken. Al 76 jastaǵy Jan ata ishki qýaty arqyly adam sengisiz áreketter jasasa, Jamalı Dıhanuly 6 metr bıiktikte 300 ótkir pyshaqtyń ústimen júrip ótken.
JAMALI DIHANULY, Etnograf:
- Eń úlken jetistigim - 2014 jyly Semeıdiń Qalbataý óńirinde ótken Er Jánibektiń 300 jyldyq asynda 300 pyshaqtyń júzinen 8 mınýt 47 sekýndta júrip óttim.
Otandasymyzǵa álemde básekeles joq eken. Rekordshy óz kórsetkishin ary qaraı damytpaq. Oǵan qosa, Jamalı Dıhanuly 15228 adamdy bir ýaqytta "Qara jorǵa" bıine bıletken adam. 13 taraýdan turatyn rekordtar kitabynda 325 eń úzdik jetistikter jazylǵan.
Jaras Nıazbek, Dýman Súleımenov
