Aqtóbede «Aǵaıyndy tórteýdiń» biri zańsyz munaı saýdasymen aınalysqan salafıtti ustady. Tań atysymen qarý asynǵan arnaıy jasaq qala shetindegi munaı óńdeıtin zaýytty qorshaýǵa alǵan. Bul týraly KTK habarlaıdy.
Qazaqstannyń qarýly kúshteriniń ókilderi birneshe aı boıy qylmystyq topty kúzetip kelgen. Olardy ustaý úshin tártip saqshylarynan bastap, ulttyq qaýipsizdik komıteti men jemqorlyqqa qarsy kúres búrosynyń ókilderi de jumyldyryldy.
Belgili bolǵandaı, kúdiktiler radıkaldy salafızm aǵymyn qoldaýshylar eken. Qara altyndy zańsyz saýdalap, qyrýar qarjymen qalta qampaıtqandardyń lańkestik pıǵyldaǵy toptarmen baılanysy bary da anyqtalǵan.
Ondaǵylar tań atysymen qarý asynǵan saqshylardyń saý ete qalaryn kútpegendeı. Al zaýytqa munaı ákelgen ondaǵan kólik qaqpa aldynda ırilip tur.
Sosyn kásiporyn aınalasyn ishki áskerdiń sarbazdary qorshaýǵa aldy. Óıtkeni urlanǵan qara altyndy qylmystyq top osynda tapsyryp kelgen eken. Jetkizýshilerdiń birin Ulttyq qaýipsizdik qyzmetkerleri osy kásiporynǵa keler jolda ustapty. Al qaraqshylyq jolmen alynǵan qara altyndy satýǵa deldaldyq etken taǵy bir turǵyn óz páterinen tutqynǵa alynǵan. Ózin Dosýpov dep tanystyrǵan odan munaıǵa qatysty qujattar tárkilendi.
Quzyrly organdar munaı urlyǵymen aınalysatyn qylmystyq topty ustaý úshin operasıany birneshe aı boıy josparlapty. Óıtkeni músheleriniń kóptiginen jáne elimizdiń túkpir-túkpirinde turatyndyǵynan biraz qıyndyq týyndaǵan. Sondyqtan tek Aqtóbede ǵana emes, Qandyaǵash qalasyndaǵy munaı óńdeıtin «Vernal Oıl» zaýyty da qorshaýǵa alyndy. Onda da qylmyskerler urlanǵan qara altyndy ótkizetin óz jelilerin quryp alǵan eken.
Olardyń barlyǵyn Erkin İzbasarov Almatyda otyryp basqarypty. 50 jastaǵy bul azamat qylmys áleminde «Aǵaıyndy tórteý» degen laqap atpen tanymal toptyń serkesi. Arbaǵa tańylsa da, elimizdegi munaı urlyǵyn baqylap, ony qaıda ótkizip, aqshasyn qaıda jiberýdi buıyryp otyrǵan sol deıdi Ulttyq qaýipsizdik komıtetindegiler. Ol da búgin Almatyda oqqaǵary men kólik júrgizýshimen birge kóshe boıynda kóligimen ketip bara jatqan jerinen ustaldy.
Ulttyq qaýipsizdik komıteti taratqan málimetterge qaraǵanda qylmystyq toptyń músheleri radıkaldy salafıtterdi qoldaýshylar eken. Osyndaı lańkestik pıǵyldaǵy toptar munaı urlyǵymen júıeli turde aınalysyp, tabysty kásipten tapqan aqshasyna qarý-jaraq satyp alyp otyrǵan. Ázirge qylmystyq toptyń quramynda qansha adamnyń bolǵanyn jáne qanshasynyń ustalǵanyn quzyrly organdar ashyp aıtpaı otyr.
Buǵan deıin Aqtóbede arnaıy operasıa júrgizilip jatqanyn habarlaǵan edik. Keıinirek jaǵdaıǵa qatysty UQK túsinikteme de bergen.
Derek kózi Stan.kz
