Kúmis alqa ıegerlerine prezıdenttiń atynan berilgen syılyq astanalyq Jandos Dúısekeevtiń shamyna tıdi. Ol syılyqty kórgende talyp qala jazdaǵan dep habarlaıdy NUR.KZ.

Astanalyq azamattyń jubaıy alty balanyń anasy. Jandos Dúısekeevtiń sózine qaraǵanda, bir apta buryn qalalyq ákimshilikten habarlasqandar kúmis alqa ıegerine tuńǵysh prezıdent kúni men táýelsizdiktiń 25 jyldyǵyna oraı elbasynyń syılyǵy beriletinin eskertken.

«Astana qalasy ákimshiliginen bir qyz áıelimniń telefonyna habarlasty. Tuńǵysh prezıdent kúni men táýelsizdiktiń 25 jyldyǵyna oraı elbasynyń syılyǵyna ıe bolǵanymyzdy, qala ákimshiliginiń arnaıy qyzmetkerleri kelip quttyqtaıtynyn aıtyp, úıde bolýymyzdy ótindi», — deıdi Jandos.

Elbasynyń elep-eskergenine rıza bolǵan ata-ana bul jańalyqty ul-qyzdaryna aıtyp, syılyq keletin kúndi asyǵa kútedi.

«Bala degen armanshyl emes pe? Patshadan alatyn syılyqty árqaısysy ózinshe armandap, biri kompúter dese, ekinshisi smartfon, taǵy biri qorap toly shokolad dedi. Úlken ulym 4-synyp oqıtyn edi. Ol úlkendigin bildirip, tuńǵysh prezıdentimiz balaqaılarǵa syılyq bergendi jaqsy kóredi,talaspańdar bárimizge bir-bir qap syılyq beredi, — dep ini-qaryndastaryn eliktirip qoıdy», — deıdi alty balanyń ákesi.

Jetinshi balasyna aıaǵy aýyr kópbalaly ana aýrýhanaǵa, bala-shaǵasy mektepke barmaı Astana qalasynyń ákimshilik qyzmetkerlerin tapjylmaı úıde kútip otyrady. Tipti dastarhan jaıyp, balalar syılyq ákelgen adamdarǵa óz ónerlerin daıyndapty.

Kópten kúttirgen ákimshilik qyzmetkerleri ýáde etken kúni túske taıaý kelgen.

«Tabaldyryqtan attamastan bir paketti áıelime ustatyp, sýretke túsirip, qaǵazyna qol qoıdyrdy da: «Prezıdent atynan quttyqtaımyz, syılyqty qabyl alyńyzdar», -dep dastarhanǵa qaraılamastan ketip qaldy. Biz ań-tańbyz. Balalarda túsinbeı qaldy. Bir kezde kishkentaı paketti  ashtyq. İshindegisin kórip talyp qala jazdadyq», — deıdi Jandos Dúısekeev.

Syılyq retinde tartylǵan pakettiń ishinde bir lıtr suıyq maı, bir keli kúrish, bir keli qaraqumyq, jarty keli qant, eki keli un bolǵan.

«Prezıdenttiń atynan mundaı syılyq jasap júrgenderdiń taıazdyǵyna balalarymnyń aldynda uıalǵanymnan jerge kirip kete jazdadym», — deıdi ol.

Kópbalaly áke tez arada ózderine osy týraly telefon arqyly habarlap aıtqan uıymdastyrýshy qyzǵa munyń uıat ekendigin túsindirmekshi bolǵan. Alaıda ákimshiliktegiler jigittiń ózine ursyp tastapty.

«Qaıta sizderdi oılap, osyndaı syılyq taratyp otyrǵan uıymdastyrýshylarǵa, elbasyna rahmet aıtýdyń ornyna «jaloby» aıtasyzdar dep oryssha burqyldady», — deıdi Jandos Dúısekeev.