Aqtóbe oblystyq qylmystyq ister jónindegi mamandandyrylǵan aýdanaralyq sotynyń sýdıasy Ahmetqalı Moldaǵalıev Aqtóbede maýsym aıynda bolǵan teraktiniń jaı-japsaryn aıtyp berdi, - dep habarlaıdy Tengrinews.kz.

Vıdeo Facebook áleýmettik jelisinde jarıa boldy. Onda sýdıa maýsymdaǵy teraktiniń hronologıasyn aıtady. Ol maýsymdaǵy terorıstik shabýyldyń qalaı bastalǵanyn, ony kimderdiń uıymdastyrǵanyn, shabýyldardyń barysynda quqyq qorǵaý organdarynyń qalaı áreket etkenin baıandaıdy. Vıdeo barysynda qandy oqıǵanyń sýretteri men vıdeolary, sonymen qatar lańkesterdiń qalada jáne qala syrtynda qandaı baǵyttarda qozǵalǵany kórsetilgen ınfografıkalar qoıylady. 

"Aıta keteıin, bolyp ótken oqıǵalar saýaty az jastardyń sheteldik dinı radıkalızm ıdeologtarynyń áserine túsip qalǵandyǵynan boldy. Saýatsyzdyq jáne adamnyń ózge álsizdikteri, bireýdiń áserine túsip qalý qylmystyq jaýapkershilikten bosatpaıdy", - dep eskertedi vıdeonyń sońynda Moldaǵalıev.

Aıta keteıik, qylmystyq is 201 tomnan turdy. Osy is boıynsha 215 túrli sot-medısınalyq saraptama men 26 tergeý jumystary júrgizilgen. Oblystyq prokýratýradaǵylardyń kelisimine sáıkes, kúdiktilerdi qamaý merzimi 4 aıǵa deıin sozylǵan. Sottalýshylardyń múddesin 27 advokat qorǵady. 48 adam kýáger retinde qatyssa, 88 adam zardap shekkender retinde sotqa shaqyryldy.

Sot úkimine sáıkes, Azamat Ábdirahmanov 20 jylǵa, Aıdos Jubanov 22 jylǵa sottaldy. Sottalýshylar J. Qýanyshbaev, Á. Aqpanbetov, B. Qýanyshbaev, A. Tańatarov, A. Rahmetov, A. Sadıhov, A. Imalıev ómir boıy bas bostandyǵynan aıyryldy. Qylmysty jasyryp qalǵan 18 sottalýshy 2 jyldan 5 jylǵa bas bostandyǵynan aıyryldy. Qylmyskerlerdi jasyrǵan Mırlan Erdaýov 4 jylǵa sottaldy. Al Úsen Ótepov 4 jylǵa bas bostandyǵyn shekteý jazasyna kesildi. Ómir boıy túrmege qamalǵandar erekshe rejımdegi kolonıada jazasyn óteıdi. Sondaı-aq, múlki tárkilendi.

Eske salaıyq, Aqtóbedegi terakt kezinde jeti adam qaza bolǵan. Olardyń úsheýi áskerıler, tórteýi - beıbit turǵyndar. Jaraqat alǵandar sany 30 shaqty. Lańkester  qaladaǵy ákimshilik ǵımarattar men túrmeni basyp almaq bolǵan. Dástúrli emes din aǵymynyń 25 ókili "Pantera" jáne "Pallada" qarý dúkenderine, 6655 áskerı bólimine shabýyl jasaǵan.