«Batyl júrek» syılyǵy Astana-Býrabaı tas jolynda bolǵan kólik apaty kezinde adamdardy qutqaryp júrip erlikpen qaza tapqan Qurmarbek Jáketaıdyń týystaryna beriletin boldy dep habarlaıdy kazakh_inform. Marapat «Halyq súıiktisi» ulttyq syılyǵy aıasynda taǵaıyndalǵan. «Qumarbek Jáketaıuly - shyndyǵynda beıbit kúnniń batyry. Ol jantúrshigerlik apatta adamdardy qutqarý jolynda janyn pıda etti. «Halyqtyń súıiktisi - Narodnyı lúbımes goda» qoǵamdyq syılyǵynyń uıymdastyrýshylary men ádilqazylary «Batyl júrek» qurmetti syılyǵyn eren erligi úshin Qumarbek Jáketaıulyna berýdi durys dep sheshti», - dep jazdy Facebook-tegi paraqshasynda atalǵan syılyqtyń uıymdastyrýshy Ǵalym Baıtoq. Eske salsaq, 4 jeltoqsanda Kókshetaý tas jolynda jantúrshigerlik apatta úsh jasar bala qutqaryldy.

Kýágerler Qumarbek Jaketaıuulynyń saý-tamtyǵy qalmaǵan kólik ishinen kishkentaı balany aman alyp shyqqanyn aıtady. Odan keıin artqy oryndyqta otyrǵan qyz balany qutqarýǵa umtylǵan ol art jaqtan qatty jyldamdyqpen kelip soǵylǵan avtobýstyń astynda qalǵan. Búgingi tańda áleýmettik jelilerde Qazaqstan halqy marqumnyń otbasyna kómek kórsetý aksıasyn uıymdastyryp jatyr. Qazirgi tańda bankten Serik Noıanbaıulynyń atyna arnaıy shot ashylyp, elimizdiń túkpir-túkpirinen qarjy quıylýda. Beısenbi kúni Aqmola oblystyq İİD-niń baspasóz hatshysy Gúlnár Pınchýk Qumarbek Jaketaıulyn nagradaǵa usyný máselesi aldaǵy ýaqytta sheshiletinin málim etken: «Qylmystyq isti tergeý amaldary men bolǵan oqıǵanyń mán-jaıy anyqtalǵan soń óte qıyn jaǵdaıda adamdardyń ómirin alyp qalýǵa degen umtylysy úshin marqum Qumarbek Jáketaıulyn nagradaǵa usyný máselesi sheshiletin bolady». Odan bólek «QazAqparat» HAA Aqmola oblysynda bolǵan apat jaıly tolyqqandy maqala jarıalaǵan edi.

Qumarbek Jaketaıuly Býrabaı aýdany Jańajol aýylynyń turǵyny. 1991 jyly Mońǵolıadan atamekenge oralǵan. Artynda úsh balasy, jary qaldy. Ol ómiriniń sońǵy sátinde qarshadaı balany aman alyp alýǵa kómektesip, órimdeı jas qyzdy qutqaryp qaldy. Eki jastyń ómiri úshin óz janyn pıda etti.