Aqtóbe qalalyq sotynyń sýdıasy Zınaıda Shymyrova «Munaı jáne munaı ónimderin urlaýmen aınalysty» dep aıyptalǵan toptyń quramynda«kúshtik qurylym qyzmetkerleri de bolǵanyn» aıtty dep habarlaıdy www.nur.kz.

Shymyrova 9 jeltoqsanda kúdikti toptyń músheleri Baýyrjan Batyrov pen Nurlan Qazkenovti qamaýǵa sanksıa bergende osyndaı málimdeme jasady.

Sýdıanyń sózinshe, «uıymdasqan qylmystyq topqa kúshtik qurylym qyzmetkerlerinen bólek kúzet salasynyń, munaı óńdeýshi kásiporyndardyń ókilderi men kólik júrgizýshileri de múshe bolǵan». Sotta aıyp taǵylǵan azamattardyń birqatarynyń famılıalary ataldy.

Ázirshe jarıa bolǵandary: İzbasarov, Qalıev, Erketaev, Amıtov, Dúsipov. Bul azamattardy qamaýǵa alý týraly sot sanksıasy 10 jeltoqsan kúni beriletini habarlandy.

Aqtóbe oblysy men Qazaqstannyń keıbir aımaǵynda 7 jeltoqsan kúni UQK júrgizgen arnaıy operasıa barysynda «munaı jáne munaı ónimderin urlaýmen jáne zańsyz tasymaldaýmen aınalysqan» degen kúdikpen birneshe adam ustalǵan edi.

Resmı aqparat boıynsha 7 jeltoqsan kúni UQK men Korrýpsıaǵa qarsy is-qımyl ulttyq búrosy jáne İshki ister mınıstrligi birlesip, birneshe aımaqta «munaı ónimderin jymqyrýmen aınalysqan» degen kúdikke ilingen topty ustaý operasıasyn júrgizgen.

Aqtóbedegi arnaıy operasıa munaı óńdeý zaýytynda da ótti. Arnaıy qyzmet qansha kúdiktiniń qaı jerde ustalǵany týraly naqty aqparat bermedi. Operasıa barysynda kúdiktilerden ózge munaı men munaı ónimderi bar avtosısternalar da tárkilengen.

UQK taratqan málimet boıynsha «munaı urlaýmen aınalysqandardy qorǵashtaǵan, radıkaldy salafızmdi tutynatyn qylmystyq toptyń birneshe múshesi ustalǵan».